Türkiyənin Baş naziri Rəcəb Tayyip Ərdoğan Beyaz TV-də ona həsr olunmuş "Ustanın Hekayəsi" adlı verilişdə futbola olan marağından danışıb.
Korner.az-ın Türkiyə mətbuatına istinadən verdiyi məlumata görə, Ərdoğan futbolu və "Fənərbağça"nı necə sevməsindən danışıb.
15-16 yaşlarından futbolla maraqlandığını söyləyən Baş nazir, ailəsində heç kimin futbolu onun qədər sevmədiyini də deyib.
Bundan əlavə o qeyd edib ki, uşaq yaşlarından məktəbin həyətində, məhəllədə futbol oynamağa başlayıb.
"Məhəlləmizin futbol komandası var idi. Prezidentimiz də "Fənərbağça"lı idi. Bizi hər həftə "Fənərbağça"nın oyunlarına aparırdı. Lefterə baxaraq futbolu, "Fənərbağça"nı sevdik. Onun sayəsində yarandı "Fənərbağça"ya olan məhəbbətim. O zaman stadionlara "sərbəst giriş kartı" aldıq. "Mithat Paşa" stadionuna pulsuz girərdik. İlk transferim də o zaman oldu. "Camialtı"na transfer oldum. Atamın xəbəri yox idi. Əvvəlcə əsəbiləşdi, amma sonra onu da alışdırdım. "Fənərbağça"lılıq bu cür başladı. Bizim ailədə həyat yoldaşımdan başqa, hamı "Fənərbağça"lıdır. Xanımım isə "Beşiktaş" azarkeşidir. Lakin son hadisələrdən sonra ailəliklə futboldan soyuduq", – deyə Baş nazir bildirib.
