“Gərgin oyun keçdi. İlk üçlükdə qərarlaşan komandaların görüşündə belə gərginlik olur. Düşünürəm ki, keyfiyyətli oyun alınmadı, daha çox mübarizəli bir oyun izlədik”.
Korner.az-ın PFL-in saytına istinadən yaydığı xəbərə görə, bu sözləri “İnter”in baş məşqçisi Kaxaber Sxadadze “Neftçi” üzərində qələbədən (2:0) sonra keçirdiyi mətbuat konfransında deyib.
Gürcüstanlı məşqçi futbolularının rəqib səhvindən düzgün yararlandıqlarını bildirib: “Düzdür, “Neftçi”də və “İnter”də keyfiyyətli oyunçular var. Amma bu tip oyunlarda emosiya yüksək olur. Külək oyuna təsir etsə də, oyunçularım işin öhdəsindən gəldilər. Futbolçularım rəqibin səhvindən istifadə edə bildilər və iki qol vurdular”.