Topaz Premyer Liqasında IX turun “Kəpəz” – “Neftçi” (0:1) oyunundan sonra meydan sahiblərinin baş məşqçisi Şahin Diniyev jurnalistlərin suallarını cavablandırdı.
O, əvvəlcə matç barədə fikirlərini bildirdi:
– Məğlub olsaq da, komandadan razı qaldım. Oyundan-oyuna futbolçular daha yaxşı təsir bağışlayırlar. Birinci hissədə Viktor Oseqeyl rəqib qapıçı ilə təkbətək çıxsa da, fərqlənə bilmədi. Əvəzində standart vəziyyətdən sonra qol buraxdıq. Bundan sonra uzun ötürmələrlə oynamağa başladıq. Komanda çox istəkli idi. Bugünkü duruma görə komandadan razı qaldım. Diqqətimizi növbəti oyuna yönəltməli, sona qədər mübarizə aparmalıyıq. Stabil heyəti qurmaq vacibdi. Hələ ki, axtarışdayıq. Əlimizi yerə salıb, dayanmamalıyıq. Təkcə ölümə çarə yoxdu. Bugünkü məğlubiyyətə görə məsuliyyəti mən daşıyıram. Gec-tez bu durumdan çıxacağıq. Bizim də küçəmizdə bayram olacaq.
– Hakimlikdən razı qaldınız?
– Buna tərkara baxdıqdan sonra cavab verə bilərəm.
– Sonuncu pillədə qalmaq Şahin Diniyevin səbr kasasını nə vaxt daşıracaq?
– Şahin Diniyevdən əvvəl “Kəpəz” azarkeşləri var. Bu pillə Gəncə adına layiq deyil. Mən də bu vəziyyətlə barışmaq istəmirəm və barışmayacam. Başımızı aşağı salıb işləməliyik. Dekabra kimi dözüb fasiləyə nisbətən yaxşı vəziyyətdə yollanmalıyıq. Heç bir səbəb axtarmırıq. İnanıram ki, vəziyyətdən çıxacağıq.
– “Qəbələ”ni udan “Kəpəz” var, bir də “Neftçi”yə məğlub olan “Kəpəz”. Bu gün komandanıza nə çatmadı?
– Stabil heyəti müəyyənləşdirə bilmirik, bu da oyunumuza təsir edir. Formalaşmış heyətin olması labüddü. Bu gün vəziyyət belədi və bununla barışmamalıyıq. Əl-ələ verib, bu acınacaqlı vəziyyətdən çıxacağıq.
– “Kəpəz”in heyətinin ideal olmaması bəllidi. Qışda necə olacaq?
– “Neftçi”nin ehtiyatda olan 9 futbolçudan kaş 3-ü bizdə olaydı. Bu vəziyyətimizi görüb, qəbul etmişəm. İstefa vermək çox asandı, amma mən dəyişikliyə inanıram. Qışdan sonra 1-2 oyunçu cəlb edəcəyik.
– Ardıcıl səfər matçlarından sonra evdə oynadınız. Bir də bu vəziyyələ rastlaşsaz, yenə razılaşacaqsız?
– İlk dövrədəki 2 ev matçını udsaydıq, daha yaxşı yerdə olacaqdıq. Belə olan halda psixolji durumdan çıxardıq. Bu gün vəziyyət belədi. Meydançaya görə bu riskə dəyərdi. Bu vəziyyətdən mütləq çıxacağıq. Mayda da bu sözümün üstündə durduğumu görəcəksiz. Hər uğursuzluqda bir uğur var. (FutbolPress.az)
