Topaz Premyer Liqanın 31-ci turunda sabah AZAL-ı qəbul edəcək “Rəvan” bu oyuna hazırlığı başa vurub.
Korner.az-ın klubun saytına istinadən verdiyi məlumata görə, “Bayıl Arena”da baş tutan son məşq təxminən 1 saat davam edib. Baş məşqçi Ramil Əliyev hazırlıq ərzində yetirmələrini qısa və dəqiq ötürmələr üzərində xüsusi çalışdırıb. Futbolçular təzyiq altında topu özündə maksimum dərəcədə çox saxlamaq tapşırığını da yerinə yetirib. Məşqin sonunda isə cinah asmaları və qapıya zərbələr üzərində işləməyə imkan oldu.
Komandada növbəti oyun üçün yalnız bir itki var. Amma bu, çox ciddi itkidir. Belə ki, cari mövsüm 14 qol vuraraq komandamızın əsas qoleadoruna çevrilmiş Xuan Manuel Varea sarı vərəqə limitini doldurduğuna görə cəzalıdır və bir matç buraxmalı olacaq. Argentinalı futbolçu cari mövsüm Topaz Premyer Liqasındakı bütün oyunlarda start heyətində meydana çıxmışdı. Başqa sözlə, onun seriyası da qırılacaq.
Əvəzində “Kəpəz”lə son oyunda cəzalı olan Orxan Lalayev, Samuel Barlay və Miloş Adamoviç cəzasını başa vurub. Baş məşqçi Ramil Əliyev bu “üçlük”dən savayı, zədələrini sağaldan Nikolay Orlovski və Mindauqas Kalonasın da xidmətindən yararlana biləcək.
