Qurban Qurbanov: “Çox vacib oyundur”
21.02.2024 , 13:58
Avropa Liqasının pley-off mərhələsinin cavab görüşü çərçivəsində keçiriləcək “Qarabağ” – “Braqa” oyunu öncəsi Ağdam komandasının baş məşqçisi Qurban Qurbanovun mətbuat konfransı keçirilib.
Korner.az xəbər verir ki, təcrübəli mütəxəssis sabah baş tutacaq qarşılaşma barədə fikirlərini açıqlayıb:
“Çox vacib, dəyərli oyundur. Bu matç ətrafında çox danışmaq istəmirəm. İlk oyunun hesabı bizi aldatmamalıdır. Fikrimizi tam rəqibə yönəltmişik. Cavab qarşılaşmasında daha intizamlı oynamalıyıq. İnanıram ki, futbolçularımız soyuqqanlı olacaq və düzgün oynayacaqlar. Matçı yaxşı notda başa vurmaq istəyirik. Şans varsa, bundan istifadə etməyə çalışacağıq.
“Braqa” böyük klubdur. Azarkeşlərinin qələbə tələb etməsi gözləniləndir. Başqa cür ola bilməz. Çünki onların mərhələ keçmək şansı daha çox idi. “Braqa”nın gücünü bilirik. Onların keyfiyyətinə, bacarığına bələd idik. Qələbə qazanmağımız o demək deyil ki, biz onlardan üstünük. Futbolçulara hələ orada demişdim ki, Bakıdakı qarşılaşmada daha yaxşı oynamalıyıq ki, bu rəqibi üstələyək. “Braqa”nın rəqibə xoş olmayan oyun üslubu, böyük təcrübəsi var. İllərlə bu cür gərgin oyunlar keçiriblər, buna öyrəşiblər”. (Report)
