"Biz Coşqunu 2 il bundan əvvəl "MKT-Araz"dan transfer etmişik. O, bizim klubun yetirməsi deyil və sənədlərinin saxtalaşdırılmasında bizim hər hansı rolumuz yoxdu".
Bu sözləri Korner.az-a açıqlamasında "Qəbələ" Futbol Akademiyasının direktor müavini Nail Kərimov bu gün AFFA İntizam Komitəsinin "Qəbələ"nin 17 yaşadək futbolçulardan ibarət komandasının üzvü Coşqun Süleymanovun sənədlərinin saxta olmasına görə cərimələməsi və kluba 1000 manat cərimə kəsilməsi, həmçinin baş məşqçi Famil Xəlilova xəbərdarlıq etməsinə münasibət bildirərkən deyib.
Direktor müavini bildirib ki, Coşqun Süleymanov həm "MKT-Araz"da ikən, həm də "Qəbələ"yə gəldikdən sonra AFFA-nın aşağı yaş qrupu üzrə liqalarında iştirak edib: "Qəbələ" bu iki ildə onun üçün həm maddi, həm də fiziki əziyyət çəkib. İndi belə bir qərarla qarşılaşmaq təəssüfvericidi. Coşqun psixoloji problemləri olan futbolçudu. Ancaq istedadlı olduğuna görə komandada saxlamışıq. Bizə gələndə sənədlərində 1998-ci təvəllüdlü olduğu göstərilmişdi. Amma istedadlı olduğuna görə biz onu U-17 liqasında oynadırdıq".
İntizam Komitəsinin qərarının başadüşülməz olduğunu söyləyən direktor müavini yalnız "Qəbələ"nin öz yetirməsi olan futbolçuların "lipalaşdırılmadıqlarına" əmin olduqlarını vurğulayıb: "İntizam Komitəsinin qərarları da qəribədi. Komandanın baş məşqçisinə niyə xəbərdarlıq olunub ki? Məgər "lipalaşdırmaya" görə baş məşqçi məsuliyyət daşıyır? Üstəlik, kluba 1000 manat cərimə kəsilib. Niyə? Axı biz bu uşağı AFFA-nın keçirtdiyi çempionatda görüb bəyənmişik və əvvəlki klubundakı sənədləriylə transfer etmişik. Biz yalnız "Qəbələ"nin öz yetirməsi olan futbolçuların sənədlərində çıxacaq nöqsanlara görə cəza və cəriməyə razıyıq. Axı klub Daxili İşlər Nazirliyi deyil ki, transfer etdiyi bütün futbolçuların sənədlərinin saxta olub-olmadığını araşdırsın. Klubun belə bir səlahiyyəti yoxdu, ancaq AFFA-nın var".
Nail Kərimov deyib ki, cəzaya baxmayaraq, futbolçu klubdan göndərilməyəcək: "Yəqin ki, bundan sonra U-19 komandamızın formasını geyinəcək".
