.jpg)
Fasiləyə yollanan “Qəbələ” futbol klubunun qış hazırlığı 3 mərhələdən ibarət olacaq.
Korner.az-ın məlumatına görə, komanda üzvləri yanvarın əvvəlində bir araya gələcək.
İlk iki təlim-məşq toplanışı ölkə daxilində, üçüncü mərhələsi isə yanvarın 20-dən fevralın 2-dək Türkiyənin Antalya bölgəsində olacaq. Komanda ötən qış fasiləsində olduğu kimi, bu dəfə də Bələk qəsəbəsindəki “Qloriya” otelində qalacaq. Antalya toplanışı müddətində “Qəbələ” 4 yoxlama oyunu keçirməyi planlaşdırır. Matçlar yanvarın 22-i, 25-i, 28-i və fevralın 1-də nəzərdə tutulub. Hələlik rəqiblər dəqiqləşməyib. Amma Almaniyanın “Kayzerslautern” klubu ilə ilkin razılıq əldə olunub.
“Qəbələ”nin baş meneceri Zaur Əzizov klubun qəzetinə müsahibəsində bildirib ki, rəqiblər baş məşqçi Ramiz Məmmədovun istəyinə uyğun olaraq müəyyənləşəcək. Heyətdə isə böyük dəyişikliklər gözlənilmir: “Doğrudur, menecerlər bizə legionerlər təklif edirlər. Ona görə də, bu məsələləri, hansı mövqelərin güclənməli olduğunu müzakirə edəcəyik. Heyəti qorumağı nəzərdə tutsaq da, ola bilsin ki, kimlərləsə yollarımızı ayırdıq. Hər halda, bütün bunlara baş məşqçi qərar verəcək”.
