Topaz Premyer Liqasının VII turunun son oyunu keçirilib. Öz meydanında “Zirə”ni qəbul edən “Qarabağ” rəqibi ilə xalları yarı bölüb. Matç qolsuz bərabərliklə yekunlaşıb – 0:0.
Oyundan sonra keçirilən mətbuat konfransında “Qarabağ”ın baş məşqçisi Qurban Qurbanov matç haqda fikirlərini bildirib:
“Ağır oyun oldu. Oyun alınmayanda futbolçular üçün daha çətin olur. Mübarizə çox idi meydanda, lakin topa istədiyimiz kimi sahibola bilmədik. Rəqib yaxşı müdafiə olundu. Matçın sonuna kimi oyun sistemlərindən əl çəkmədilər. Futbolçularımızın rahat oynamasına imkan vermədilər. Ümumən futbolçulardan razı qaldım. Bəzi oyunçularımın səhvləri olsa da, razı qaldım. Azarkeşlərə təşəkkür edirəm”
Mütəxəssis daha sonra jurnalistlərin suallarını cavablandırıb:
– Yaku Jezniçakın durumu…
– Sabah tam bilinər. Əzələsində dartılma hiss etdi.
– Oyunun sonuna qədər real qol şansı olmadı. Bu komandanın adaptasiyası ilə bağlıdır, ya buraxdığınız heyətlə?
– Heyət baxımından anlaşılmazlıq ola bilərdi. Birlikdə az oynayıblar.”Roma” ilə oyundan sonra istər-istəməz ruh düşkünlüyü var idi. Rəqibin də oyununu xüsusi qeyd etmək lazımdı. Müdafiədə diqqətli oynadılar. Hər ikisinin təsiri var.
– Fasilə komandaya necə təsir edəcək?
– Dəfələrlə olan bir şeydi. 11 futbolçumuz milli komandalara gedir. Bizə bu vaxtlarda daha çox bir yerə olmaq lazımdı. Yenə də normal qarşılayıram.
– Ötən mövsüm birinci dövrəni iki məğlubiyyətlə bitirdiniz. Bu mövsüm isə məğlubiyyət olmadı. Bu sizin gücünüzdən xəbər verir, yoxsa rəqiblərin?
– Bu il futbolçularımız çoxdu. Dəyişiklik edə bilirəm. Ötən il iki məğıubiyyətimiz var idi. Bəlkə tam hazırlaşa bilmirdik. Uduzduğumuz oyunlarda da zəif olmamışdıq. Rəqibin zəif və ya güclü olması fikrini söyləməyə hazır deyiləm.
