"İlk oyunda 3:0 hesabı ilə qələbə qazanmağımıza baxmayaraq, rəqibimizə hörmətlı yanaşırıq. "Zestafoni" yaxşı kollektivə malikdir. İnanıram ki, onlar doğma meydanda bizə qarşı böyük həvəslə çıxış edəcəklər".
Korner.az-ın məlumatına görə, bu sözləri "Neftçi"nin futbolçusu İqor Mitreski deyib. Makedoniyalı futbolçu Çempionlar Liqasının ikinci təsnifat mərhələsinin cavab qarşılaşması çərçivəsində "Zestafoni" ilə oyunöncəsi keçirilən mətbuat konfransında Azərbaycan futbolu haqda fikirlərini də bildirib:
"Azərbaycan futboluna gəldikdə isə son 2-3 ildə burada inkişaf hiss olunur. Bir sıra klubların heyətini gücləndirməsi, infrastrukturları bunu deməyə əsas verir. Bu baxımdan da Azərbaycan klubları Avrokuboklarda inamlı çıxış edir. İnanıram ki, bu axşam da növbəti mərhələyə adlayan tərəf biz olacağıq".
Qeyd edək ki, "Zestafoni" – "Neftçi" matçı bu axşam Bakı vaxtı ilə saat 22:00-da başlayacaq. Bu komandalar arasında Bakıda baş tutan ilk görüş isə 3:0 hesabı ilə "Neftçi"nin xeyrinə başa çatıb.
