Topaz Premyer Liqasının XXV turun “Qəbələ” – “Kəpəz” (3:0) oyunundan sonra təşkil olunan mətbuat konfransında meydan sahiblərinin baş məşqçisi Roman Qriqorçuk jurnalistlərin suallarını cavablandırıb.
O, əvvəlcə matç barədə fikirlərini bildirib…
– Bu gün qalib gəldik. Ancaq kənardan göründüyü kimi, bu, asan olmadı. Sadəcə, düzgün oynadıq, qol imkanlarımızdan istifadə etdik.
– İkinci hissədə tempin enməsi motivasiyanın aşağı düməsiylə bağlı idi?
– Yox. Aydın məsələdi ki, rəqib öz oyun üslubunu davam etdirirdi. Bizə hər oyunda həm xal qazanmaq vacibdi, həm də futbolçular yaxşı formada olmalıdı. İkinci hissədə qol vura bilməməyimiz epizodlardan pis yararlanmağımızla bağlı idi.
– Mayın 28-də kubokun finalında oynayacaqsınız. Bir gün sonra millinin yoldaşlıq görüşü var. Bu məsələni baş məşqçi Qurban Qurbanovla danışmısınız?
– Mən heç kimlə heç nə müzakirə etməmişəm. İndi millini yox, finalı düşünürük. Bütün futbolçulara şans verəcəyik. Təbii ki, kim daha hazır olacaq, onları buraxacağıq. Aydındı ki, finalda oynayanlar millidə oynaya bilməz. Onu ehtimal edirəm ki, finalda oynamayan mili üzvləri çıxış edə bilərlər.
– Rəqiblərə qarşı ikili standartla yanaşırsız. Bəhlul Mustafazadənin “Qəbələ”yə qarşı oynamasına icazə vermədiniz. Ancaq Roman Hüseynova güzəştə getdiniz. Bu, “Kəpəz”in “Sumqayıt”dan fərqli zəif olmasıyla bağlıdı?
– Romanla bağlı niyə belə olduğunu dəqiq deyə bilmərəm. Fikrim rəqibə görə dəyişmir. Mövqeyim budu ki, müqaviləylə bizə məxsus olan futbolçunun “Qəbələ”yə qarşı oynamasına icazə verilməsin. Ancaq ola bilər ki, rəhbərliklə başqa məqamlar razılaşdırılıb. Bu haqda xəbərim yoxdu. Rəhbərliyin mövqeyinə də qarşı çıxmıram.
