Azərbaycan yığmasının qapıçısı Kamran Ağayev Qazaxıstanla keçirilən yoldaşlıq görüşü ilə bağlı jurnalistlərin suallarını cavablandırıb.
– Türkiyədə keçirdiyiniz yoldaşlıq görüşü çərçivəsində Qazaxıstan yığmasına məğlub oldunuz. Buna nə səbəb oldu?
– Oyunun təzyiqinə əsasən deyə bilərik ki, o qədər də çətin görüş keçmədi. Qapıya vurulan ilk zərbədə müdafiədə boşluq oldu və heç nədən qol vurdular. Düşünürəm ki, o topun qapıya getməsinin qarşısını ala bilərdim. Necə çətin top olursa-olsun, onun qapıya getməsinin qarşısını almağa borcluyuq. Ümumilikdə pis oynadığımızı demək olmaz. İkinci hissədə daha yaxşı çıxış etdik. Sadəcə, standart vəziyyətlərdə uduzurduq. Çünki bizdə futbolçular boydan balaca idi. Ancaq bir az tez fikirləşib, sürətli oynasaydıq, nəticə əldə edə bilərdik.
– Hesab arasındakı fərq daha böyük ola bilərdi. Hətta iki dəfə qapı tiri sizi qoldan xilas etdi…
– İdmanda təsadüfi nəticə vermək olmur. Ola bilər ki, idmançı təsadüfən məğlub olsun. Amma qələbə təsadüfi olmur. Baş məşqçi matçdan əvvəl də bütün oyunçuları yoxlayır. Şərait necə olur-olsun, millinin heyətinə zəif oyunçu gəlmir. Heyətdə ən yaxşılar olur. Amma əvəzolunmaz futbolçu yoxdu. Hər kəs meydanda normal oyun göstərdi. Qapı tiri epizodunda isə top aşağıdan gəlsə, bəlkə də, çıxarardım və ya qol olardı. Amma yuxarıdan getdiyi üçün tirə dəydi. Göz qabağında olan isə bizim minimal hesablı məğlubiyyətimiz oldu.
– Bir həftəlik təlim-məşq toplanışından sonra bu nəticə ədalətli oldumu?
– Uğurlu nəticə qazanmaq üçün bu cür toplanışlar çox olmalıdı. Üstəlik, daha güclü komandalarla oynamaq lazımdı. Çünki seçmə mərhələ ilə yoldaşlıq oyunları tam fərqlidi. Məsələn, Qazaxıstandan daha güclü komandalarla oynayıb öz gücümüzü göstərməliyik. Gedib Hindistanı yenib, özümüzü aldatmamalıyıq. Nə vaxta qədər yalnız Azərbaycanda nəticə qazanacağıq? Artıq ölkədən kənarda da qələbə əldə etmək lazımdı.
apasport.az
