Bəzi elektron informasiya vasitələrində “İnter” futbol klubunun cari ilin yanvar ayında Türkiyənin Antalya mahalında keçirdiyi təlim-məşq toplanışı zamanı “Titanik Deluxe” otelinə guya borclu qaldığı barədə məlumatlar özünə yer tapmışdır.
Korner.az-ın məlumatına görə, “İnter” PİK-in rəhbərliyi bəyan edir ki, klubun adı sadalanan otelə hər hansı bir borcu yoxdur.
Bunu otelin rəsmi nümayəndəsi də Azərbaycanın aparıcı mətbuat orqanlarından birinə açıqlamasında bildirmişdir. Qeyd etmək yerinə düşərdi ki, belə bir iddia ilə toplanışı təşkil edən AFSS şirkəti çıxış edir, bu şirkət göstərilməyən xidmətlərə görə “İnter” PİK-dən pul tələb edir. “İnter” PİK xüsusilə vurğulayır ki, klub tərəflər arasında imzalanmış müqavilə üzrə maliyyə öhdəliyini tam yerinə yetirmişdir və müqavilədənkənar əlavə iddia edilən borc məbləğini ödəməkdən imtina etmişdir. Çünki AFSS şirkətinin təqdim etdiyi aktda bir sıra pozuntular aşkarlanmış və iradlarımız qarşı tərəfə çatdırılmışdır.
AFSS şirkəti də bir neçə dəfə yeni akt göndərmiş və hər dəfə də aktda müxtəlif borc öhdəliklərinin olduğunu iddia etmişdir. Klubun aktı birgə araşdırılması təklifi AFSS tərəfindən cavabsız qalmış və yekun akt bu günə kimi imzalanmamışdır. Akt araşdırıldıqdan və imzalandıqdan sonra kimin kimə borcu olması bəlli olacaqdır.
“İnter” PİK-in rəhbərliyi AFSS şirkətinin iddialarını əsassız hesab edir və möhürsüz, eyni zamanda imzasız akt adlı kağız parçasını mətbuata sızdırmaqla “İnter” PİK haqqında mənfi imic yaratmağa çalışır. Klub rəhbərliyi toplanışın xərclərini əhatə edən yekun sənəddən başqa AFSS şirkəti tərəfindən təqdim edilən məbləği əsassız sayır və həmin şirkətin qaldırdığı iddianı “İnter”PİK-“Titanik Deluxe” oteli münasibətləri müstəvisində təqdim etməyə çalışmasını ictimai rəyi çaşdırmağa yönəlmiş cəhd kimi qiymətləndirmək olar.
“İnter”PİK həmişə ikitərəfli münasibətlərə önəm verən klub olmuşdur və qardaş Türkiyədə keçirdiyi bütün toplanışlarda maliyyə öhdəliklərini layiqincə yerinə yetirmiş, bundan sonra da yerinə yetirəcəkdir.(klub saytı)
