“Dadaş Zeynalovla 7 ay birlikdə çalışmışıq. Onunla hər hansı problemimiz olmayıb. İşdən ayrılmaqla bağlı ərizə ilə müraciət edib, biz də müsbət cavablandırmışıq”.
Bu sözləri Korner.az-a açıqlamasında “Neftçi”nin icraçı direktoru Elnur Məmmədov klubun işdən ayrılan operatoru Dadaş Zeynalovun iddialarına cavabında deyib.
Klub rəsmisi bildirib ki, D.Zeynalov klubun ona təklif etdiyi yeni şərtlərlə razılaşmadığı üçün işdən ayrılıb: “Bilirsiz ki, klubda yeni struktur qurulur. Onunla işləmək istəməsək, yeni strukturda onu da nəzərə almazdıq. Halbuki biz ona yeni şərtlərlə müqavilə təklif etdik. Dünən mənimlə görüşmək istədi, görüşdük və dedi ki, yeni şərtlərlə razı deyil. Ərizəsini təqdim etdi. Ona gələcək karyerasında uğurlar arzulayıram”.
Elnur Məmmədov Dadaş Zeynalovun Qarabağ döyüşlərində iştirak etdiyini dilə gətirməklə manipulyasiya etdiyini də vurğulayıb: “Mənə dedi ki, mən Qarabağ müharibəsində döyüşəndə siz harda idiz? Mən də dedim ki, Qarabağ müharibəsi dövründə mənim 12-13 yaşım var idi, sizin yaşınız hərbi xidmətə düşüb və döyüşə getmisiz. Bu gün yenidən müharibə başlasa, biz gedəcəyik. Qarabağ müharibəsi ən ağrılı yerimizdir, bu faciənin toxunmadığı azərbaycanlı ailəsi, yəqin ki, tapılmaz. Sadəcə belə həssas mövzu ilə manipulyasiya etmək xoş deyil”.
