“Neftçi”nin baş məşqçisi Böyükağa Hacıyev bu gün “Tobol”a qarşı keçirdikləri yoxlama oyunundan sonra jurnalistlərin suallarını cavablandırıb.
– Oyun haqqında fikirləriniz?
– Bu oyunda əsas heyətdən beş nəfər oyunçuya istirahət verilmişdi. Çünki bilirsiniz ki, 2 gün bundan əvvəl bu uşaqlar “Fənərbağça” kimi kluba qarşı 90 dəqiqə meydanda olublar. Buna baxmayaraq, əlimizə yaxşıca fürsət düşmüşdü və əvəzedici heyətdən gətirdiyimiz oyunçulara baxmaq şansımız oldu. Və siz də şahidi oldunuz ki, doğrudan da, çox qabiliyyətli uşaqlardırlar. Çox böyük perespektivləri var. Gəlin unutmayaq ki Azərbaycan futbolunun gələcəyi bu gənclərdi. Mənə elə gəlir ki, hesab özü hər şeydən xəbər verir. Düzdü, bir balaca müdafiə xəttində mövqe səhlərimiz oldu. Təbii ki, yaxın günlərdə biz bunların üzərində işləyəcəyik. Bilirsiniz ki, ayın 12-dən komanda Antalyada təlim-məşq toplanışındadı. Mən də elə həmin gündən komandanı götürmüşəm. Artıq bu gün üstündən 9 gün keçir və çalıçacağıq ki, təlim-məşq toplanışının sonuna qədər bütün çatışmazlıqları aradan qaldıraq. Klub rəhbərliyinə yaxşı təlim-məşq toplanışı üçün bizə şərait yaratdığına görə öz minnətdarlığımı bildirirəm. Hər şey yüksək səviyyədədi. Biz də gündə iki dəfə olaraq məşqlərimizi davam etdiririk. Yəqin ki, növbəti yoldaşlıq görüşlərinə də gələcəksiz və mənə elə gəlir ki, “Neftçi”də problem yoxdu.
– Komandaya yeni cəlb olunan oyunçular haqqında nə deyə bilərsiniz?
-Komandaya, əsasən, “Neftçi” futbol məktəbinin öz yetirmələri cəlb olunub. Özünüz də şahidi oldunuz ki, bu uşaqlarda futbola böyük istək var. Qalanı biz məşqçilərin problemidi. Çalışcağıq ki, gəncləri düzgün istiqamətləndirək.
– Komanda bu gün neçə faiz hazırdı?
– Hardasa 50-55%. Yəqin ki, bunu 75%-ə çatdıracağıq. 75%-lə çempionata başlayarıq. çempionatın gedişində komanda öz “pik”inə çatacaq.
– Sizə qədər komandanı Tərlan Əhmədov və Nazim Süleymanov çalışdırmışdı. “Onların komandası”yla “Fənərbağça”yla oyuna çıxan komanda arasında fərq böyük idimi?
– Mən bu gün durub komandamı tərifləsəm, pis çıxar. Bu komandanın necə futbol oynadığını siz yazarlar bizdən yaxşı bilirsiniz. Ona görə də mən komandada problem görmürəm. Bu komandanın heç bir transferə ehtiyacı yoxdu. Əldə olan oyunçulardan düzgün istifadə eləmək lazımdı və ən vacibi oyunçularda olan motivasiyanı qaldırmaq lazımdı.
– Toplanışa gətirilən gənclərə çempionat oyunlarında şans verməyi düşünürsünüzmü?
-Siz şahidi olacaqsınız bunun. Biz bu futbolçulara nahaq yerə əziyyət çəkmirik. Futbolumuza yeni futbolçular bəxş etməyə çalışırıq.
– Komandanın fiziki durumu necədi?
– Hələ ki istədiyimin 70%-nə çatdırmamışam.
– Nazim Süleymanov demişdi ki, mən bu oyunçularla çempionluğa söz vermirəm. Bəs siz necə düşünürsünüz, “Neftçi” çempion ola biləcəkmi?
– Bizimçün 2-ci yerlə 10-cu yer arasında heç bir fərq yoxdu. May ayında özünüz də görəcəksiz. “Neftçi” dalbadal 4-cü dəfə çempion olacaq.
– Sizin “Neftçi”yə qayıdışınız gözlənilirdi. Sizcə, bu niyə beləydi?
– Məşqçi göstərdiyi nəticələrə görə, sayılıb seçilir. Mən istefa verəndən sonra mənə müşavir vəzifəsi verildi. Yalnız Sadıq Sadıqova məruzə edirdim. Mən baş məşqçilərin işinə qarışmırdım. Bunu dəfələrlə mətbuata da bildirmişəm ki, mən komandanın məşqlərində də olmurdum. İstəmirdim kimləsə görüşəm. Hansısa məşqçini intizarda qoymaq istəmirdim. Komanda mənə verildi. “Neftçi” komandası mənimçün doğmadı. Mən ömrüm boyu mənə verdiyi reytinqə görə, “Neftçi” komandasına borcluyam. Və mən bu komandanı heç vaxt başsız qoya bilməzdim.
– Nazim Süleymanovu müşavir vəzifəsinə qoysalar, buna münasibətiniz necə olar?
– Buna qarşı münasibətim çox yaxşı olardı. Mən bunu Nazimə də dedim. Necə olur ki, mən APOEL=lə oyuna gedirəm – Nazim orada, “İnter”lə oyuna gedirəm – Nazim orada, gedirəm “Partizan”la oyuna, Nazim orada.
– O, ora Berti Foqtsun köməkçisi kimi getmişdi
– Üzr istəyirəm, o necə köməkçi idi ki, mən bir il qışqırdım ki, Arazı aparın! Arazı aparın! Necə olur, “o vuranda su çıxır”, “mən vuranda qan”?
-Düşünürsünüz ki, bu planlı şəkildə idi?
-Mən üç il bundan qabaq “Neftçi”yə dəvət alanda mənlə bərabər namizədlər siyahısında Nazim Süleymanovun da adı var idi. Siz mənim yerimdə olsanız fikirləşməzsiniz? Nazim Süleymanov “soğan sandıqla” gəldi oturdu. Halal xoşu olsun, biz ona heç bir müdaxilə eləmədik. Bir də deyirəm unutmayın! Bir adamın məşqçi olması üçün , gərək anadan məşqçi doğulsun. Məşçinin bir həqiqəti olmalıdı o da komandası. Yox, mənə tranfer verin və s. Mənim burda marağım nədi? Transferə girişən məşqçilərin hansı indiyə kimi ağ günə çıxıb?
-Bu 3 ildə Böyükağa Hacıyev heç vaxt “Neftçi”dən transfer tələb etməyib?
-Mən demişəm ki, mənə filan xəttə və filan xəttə oyunçu lazımdı. Daha eməmişəm ki, filankəsi filan yerdən gətirək, filankəsi filan yerdən gətirək. Mən Ramos, Kanales və Bertuçiçnin hərəsinin diskinə cəmi 20 dəqiqə baxmışam və demişəm ki, mən bu oyunçuları istəyirəm.
-Çempionluq sözü verdiniz bəs ölkə kubokuna necə, iddialısınız?
-Həm çempion olacağıq, həm də ölkə kubokuna sahib olacağıq. Və bu il avrokuboklarda keçən il buraxdığım səhvi buraxmayacam.
-Avrokuboklara qatılacağınız təqdirdə transfer istəyəcəksiniz?
-Mayda vəziyyətə baxacağıq. Mayacan çox şey dəyişə bilər. Bəzi oyunçularımızın müqavilələri bitəcək. Mənim yəqin ki elə də rəhbərlikdən istəklərim olacaq. Onlar da məni “sındır”mazlar
– Çempion olmasaz, hansı addımı atacaqsınız?
– Bu dəfə istefa verməyəcəyəm, gözləyəcəm rəhbərlik məni göndərsin (gülür).
