Bu il üçüncüsü keçirilən Qəbələ kuboku indiyədək bu turnirdə iştirak etmiş Azərbaycan klublarının “uşaq futbolunu inkişaf etdiririk” – sözlərinin, əslində, pafosdan başqa bir şey olmadığını bir daha ortaya qoydu.
Əvvəlki illərdə “Qarabağ” və “Bakı”nın başlatdığı “ənənəni” bu il “Neftçi” davam etdirdi. Turnirin ilk ilində “Qarabağ” qrupda “Levante”, Serbiya və “Feyenoord”a (müvafiq olaraq 1:2, 0:6 və 0:1), 7-ci yer uğrunda oyunda isə yenə “Feyenoord”a 0:5 hesabıyla uduzmuşdusa, ötən il “Bakı” “qapazaltı” edilmişdi. “Zolaqlılar” turnir ərzində vur-tut 1 mqələbə qazanmışdılar – onu da penaltilərlə (“Qəbələ” üzərində). Paytaxtımızı təmsil edən və milyonlarla pul tökülüb akademiya quran “Bakı”nın futbolçu deyil, nəçi yetişdirdiyini qrup oyunları açıq şəkildə göstərmişdi – “Zenit”ə 0:2, “Portu”ya 0:6, “Feyenoord”a 0:2 hesablı məğlubiyyətlər çox mətləbdən xəbər verirdi.
Bu il isə “Neftçi” “gözüçıxmış qardaşlar”ının “ənənəsini” davam etdirdi. “Ağ-qaralar” qrup mərhələsində “Lokomotiv”ə 0:2, “Anderlext”ə 0:1, “Rapid”ə 1:2 hesabıyla uduzan “Neftçi” 7-ci yer uğrunda oynanılan bugünkü görüşdə də “Lokomotiv”ə 0:1 hesabıyla yenildi.
Üç ilin nəticəsi: belə çıxır ki, turnirə təşkilatçı “Qəbələ”dən başqa, qatılan bütün Azərbaycan klubları, qələbə qazanmaq nədi, heç-heçə də edə bilməyiblər, eləcə “sillələnib” evə göndəriliblər.
Uşaq futbolumuz inkişaf edir, eləmi, Elxan Səlhəboviç?
