Dünən Azərbaycan Birinci Divizionun 14-cü turunun “Neftçala” – “Araz Naxçıvan” oyunundan sonra, Naxçıvan təmsilçisinin meneceri Tahir Əliyev jurnalistlərə açıqlama verib.
Korner.az-ın məlumatına görə, Tahir Əliyev oyun barəsində fikirlərini bildirib:
“Oyun çox gərgin mübarizə şəraitində keçdi. Açığını deyək “Araz Naxçıvan” oyunda üstün tərəf idi. Daha çox hücum edən biz idi, müdaiə olunan onlar. Lakin qoldan sonra rəqib komandanın futbolçuları bəzən bilərəkdən yerə yıxılaraq vaxt aparırdılar. Hakim isə sonda oyuna 5 dəqiqə əlavə elədi. Lakin əslində oyuna ən azı 10 dəqiqə əlavə etməli idi. Biz buna etiraz edirdik. Gördünüz ki, biz üstünlüyü ələ almışdıq. Son dəqiqələrdə, əlavə olunmuyan vaxtlarda qol vura bilərdik. Ümid sonda ölür“
Daha sonra “Araz Naxçıvan”ın meneceri öz şikayətlərini PFL-ə göndərəcəklərini bildirib:
“Klub rəsmlərimizdən biri bütün baş verənləri protokola qeyd edib. Bütün etirazlarımızı orda bildirmişik. Biz Fariz Yusifovun idarəçiliyindən narazı deyilik. Qırmızı vərəqələri haqqlı verdi, oyunu yaxşı idarə elədi. Sadəcə əlavə edilən vaxta etiraz edirik“.
Tahir Əliyev həmçinin paltardəyişmə otağının dəhlizində baş verən hadisələrə də münasibət bildirib:
“Ümumillikdə böyük bir hadisə baş vermədi. Hamımız əsəbləşəndə hansısa şəkildə etirazımızı bildirik. Bizdə ziyalı insanlarıq. Hansısa xuliqanlığa yol vermərik“.
Sonda komandanın son oyunlarını dəyərləndirən Tahir Əliyev komandanın ilk dəfə məğlub olması və qış çempionluğu barəsində fikirlərini bildirib:
“Ümumilikdə komandamızın oyununda heç bir düşüş baş verməyib. Futbolda 3 nəticə var: Qələbə, bərabərlik, məğlubiyyət. Bu gün biz məğlubiyyət əldə etdik. Gələn tur, “Qaradağ Lökbatan”la doğma meydanda mütləq qələbə əldə edəcəyik. Yüz faiz əminəm ki, qış çempionu “Araz Naxçıvan” olacaq“.
