"Simurq"un gənc üzvü Nicat Qurbanov klubun rəsmi saytına müsahibə verib. “Neftçi”dən icarəyə götürülən yarımmüdafiəçi həm “Simurq”a keçidi və qarşıdakı hədəflər, həm də cari mövsüm haqqında bir çox sualları cavablandırıb.
– Artıq bir ildi ki, “Simurq”qa forma geyinirsən. Necə oldu ki, məhz bu komandanı seçdin?
– “Neftçi”nin əvəzedici heyətində oynayanda “Simurq”dan təklif gəldi. Premyer Liqada oynamaq istədiyimdən bunu qəbul etdim və qərar verdim ki, bu komandada forma geyinim. Çünki gənc bir futbolçu idim. İrəliyə doğru addım atmağın vaxtı idi. “Simurq”a keçdiyimə görə də peşman deyiləm. Hesab edirəm ki, düzgün qərar vermişəm.
– Bu sənin Zaqatala təmsilçisində keçirdiyin ikinci mövsümdü. Ötən ilki komanda ilə, bu günkündə hansısa fərq hiss edirsən?
– Ötən il qış fasiləsindən sonra “Simurq”un heyətinə qoşuldum. O zaman komandanın məqsədi Premyer Liqada qalmaq idisə, bu mövsümdə hədəflərimiz çox irəliləyib. Artıq Avroliqada ölkəmizi təmsil etmək üçün mübarizə aparırıq. Qarşımıza ilk altılığa düşmək, daha sonra isə medallar uğrunda oynamaq məqsədi qoymuşuq. Artıq hədəfimizin ilkini həyata keçirmişik. Bu il hər kəsə gücümüzü göstərdik. Rəhbərliyində bu işdə komandaya böyük köməkliyi oldu. Heyətə yaxşı oyunçular qatdılar. Hərtərəfli bizə köməklik etdilər. Biz də bu əziyyətlərin yerdə qalmaması üçün tam gücümüzlə oynadıq və bu günkü nəticəyə nail olduq. İnşallah, növbəti hədəfimizidə reallaşdırarıq.
– Ümumilikdə mövsümü necə dəyərləndirərdin?
– İlkin məqsəd olaraq qarşımıza ilk altılığa düşməyi qoymuşduq. Artıq bunu həyata keçirmişik. Yeni hədəfimiz isə Avroliqada oynamaqdı. Bunun üçün bizi qarşıda güclü rəqiblərlə çətin oyunlar gözləyir. Hesab edirəm ki, biz buna da nail ola bilərik.
– Bizdən başqa altılıqda mübarizə aparacaq dörd komanda artıq məlumdu. Səncə, daha hansı kollektivlər burada oynamağa layiqdilər?
– “Xəzər Lənkəran”, “Bakı” və AZAL-ın hələ oynayıb-oynamayacağı tam dəqiqləşməyib. Ancaq “Qəbələ” son turda qazandığı qələbə sayəsində buna nail oldu. Hesab edirəm ki, hər üç komandanın şansları var. Ancaq AZAL-ı xüsusən fərqləndirərdim. Düşünürəm ki, onlar buna daha çox layiqdi. Son turda hər şeyə aydınlıq gələcək.
– Son qarşılaşma haqqında fikirlərini bilmək istəyərdim. Oyundan əvvəl yayılan söz-söhbətlər sizə psixoloji təsir etmədi?
– Əlbəttə ki, görüşdən əvvəl mətbuatda çox fikirlər səsləndirilirdi. Bir çoxunu oxumuşdum. Yazılmışdı ki, “Simurq” oyunu verəcək”, “mübarizə aparmayacaq”. Ancaq biz çıxdıq və sübut etdik ki, bütün bunlar yalan informasiyadı. Əslində qalib gəlmək istəyirdik. Bunun üçün çox çalışdıq. Ancaq qismətdən qaçmaq olmaz. Qolsuz heç-heçə ilə meydandan ayrıldıq. Bu oyunda sübut etdik ki, danışılanların hamısı kimlərinsə uydurmalarıydı. “Simurq”da oynadığım dövrdə heç bir vaxt belə söhbətlər olmayıb. Ümüd edirəm ki, olmayacaqda.
– “Simurq” fasilədən sonra keçirdiyi üç rəsmi matçın heç birində qalib gələ bilməyib. Bu nəticəni nə ilə əlaqələndirirsən?
– Son oyunlarımız çox ciddi rəqiblərlə olub. Hamısı ilk altılıq uğrunda mübarizə aparan komandalar idi. “Neftçi” artıq bu işin öhdəsindən gəlməyi bacarmışdı. Çox güclü komandadı və çempionluğa ən real namizədlərdən biridi. AZAL və “Bakı” isə bizlə keçirdikləri oyunlar onlar üçün həyati önəm daşıyırdı. Ona görə də “Simurq”a qarşı tam gücləri ilə oynayırdılar. Çox gərgin qarşılaşmalar keçdi. Biz ilk altılıqda yerimizi tutduğumuzdan rahat idik. Onların isə son şansları idi. Bu səbəbdən mütləq xal qazanmalı idilər. Ancaq biz yalnız öz səhvlərimiz səbəbindən “Neftçi” ilə görüşdə məğlub olduq. Digərlərində isə iki xal toplaya bildik. Hesab edirəm ki, bu günkü nəticəmiz pis deyil.
– “Simurq”un ilk altılıq şanslarını necə dəyərləndirirsən?
– Növbəti aydan altılıq oyunlarına star veriləcək. Rəhbərlikdə qarşımıza hədəf qoyub. Ümid edirəm ki, biz buna nail ola bilcəyik və Avroliqada ölkəmizi təmsil edəcəyik. Bu qədər əziyyət çəkmişik. Sonda altılığın sonuncu yerində olmaq istəmirik. Ən pis halda çempionatı üçüncü yerdə başa vurmağı hədəfləyirik.
– Növbəti oynumuz ölkə kubokunda “Neftçi”lədi. Necə fikirləşirsən, biz ¼ final mərhələsin adlaya bilərikmi?
– Hesab edirəm ki, biz artıq “Neftçi”ni daha yaxşı tanıyırıq. İki həftə bundan qabaqda onlarla qarşılaşmışdıq və öz səhvləmizdən məğlub olduq. İnşallah, onları yaxşı təhlil edib, qalib gələrik. Şanlarımız yarı-yarıyadı. Hər şey meydançada həll olunacaq. İnaniram ki, “Simurq” bu oyunda da öz sözünü deyəcək. Təəssüflər olsun ki, icarə müqaviləsinin şərtlərinə görə, mən bu oyunda komandama kömək edə bilməyəcəm. Ancaq ürəyim uşaqlarla olacaq və mərhələ adlayan biz olarıq.
– Komandamızın heyətində yığma komandanın üzvü olan futbolçulardan birisən. Həm əsas komandaya, həm də U-21-ə dəvət alırsan. Yığmada oynamaq necə bir hissdir?
– Fikrimcə, hər bir futbolçunun əsas məqsədlərindən biri ölkəsinin yığma komandasına dəvət olunmaqdı. Çünki millinin şərəfini qorumaq həqiqətən də, qürur verici bir hissdi. Elə meydana çıxıb, dövlətivin himnini oxumaq futbolçuya yığmada oynamağın hansı məsuliyyətin verdiyini bir daha aşılayır. İnşallah, növbəti təlim-məşqlərə və oyunlara da dəvət olunaram. Futbolçu kimi mənə olan inamı doğruldaram.
