Hakimlər Komitəsinin sədri Xaqani Məmmədov "Xəzər Lənkəran"ın baş məşqçisi Con Benjamin Toşakın futbol qaydalarını bilməməkdə ittiham edib.
Korner.az-ın məlumatına görə, o, "Space" telekanalında yayımlanan "Qol" verilişində əvəzedicilər arasında keçirilən çempionatın "Rəvan" – "Xəzər Lənkəran" matçında baş hakimin penalti qərarını laynsmanın xəbərdarlığından sonra dəyişməsinə Toşakın verdiyi reaksiyaya cavab olaraq bunları deyib:
"Futbolda belə şeylər həmişə olub. Köməkçi hakimlər baş hakimə hansısa epizodda kömək edirsə, doğru qərar verdirirsə, burda pis nə var ki? Hər ölkədə belə şeylər yaşanır. Amma görün Toşakın futbol biliyi hansı səviyyədədi ki, bunları bilmir. Bunlar onun savadsızlığının göstəricisidi. Mən hələ də başa düşə bilmirəm ki, belə adamlar klublarda necə işləyirlər?"
