"Qarabağ"la oyunda qələbə bizə vacib idi. Çünki qazanacağımız 3 xal bizim avrokuboklara getmək şansımızı yaxşılaşdıra bilərdi. Lakin alınmadı və "Qarabağ" bizi minimal hesabla da olsun məğlub edə bildi".
Bu sözləri Korner.az-a açıqlamasında "Qəbələ"nin müdafiəçisi Vurğun Hüseynov deyib.
AZAL-la Premyer Liqanın təsnifat mərhələsinin son turunda qırmızı vərəqə alan və bu üzdən "İnter"lə oyunu buraxan Hüseynov "Qarabağ"la oyunda meydana çıxmadı. Daha doğrusu əyalət klubunun çalışdırıcısı Ramiz Məmmədov Hüseynova şans vermədi.
Müdafiəçi bunu baş məşqçinin ona inamsızlığı kimi qələmə vermir:
"Deməzdim ki, buna gözə Ramiz müəllim mənə "Qarabağ"la oyunda şans vermədi. Sadəcə hər baş məşqçinin öz fikiri var. Əsas məsələ qarşıdakı "Simurq"la oyundu. Bu qarşılaşmada 3 xal qazanıb şanslarımızı saxlamaq istəyirik. Düşünürəm ki, bu oyunda meydana çıxa bilərəm. "Simurq"la oyunda qazanacağımız 3 xal bizi digər oyunlara daha çox motivasiya edəcək".
V.Hüseynov daha sonra komandanın nəticə verə bilməməsini belə dəyərləndirib:
"Biz meydana çıxıb sona kimi mübarizə aparırıq. Rəhbərlik də, sağ olsun bizə hər cür şərait yaradıb. Sadəcə özümüz də, bilmirik ki, niyə belə olur. İnanırıq ki, qarşıdakı turlarda bu tilsimi qıracağıq".
