"Bakı" daha bir transfer reallaşdırıb. Korner.az-ın klubun saytına istinadən yaydığı məlumata görə, yunanıstanlı hücumçu Vangelis Mantsiosla 1 iilik müqavilə imzalanıb.
Mantsios peşəkar karyerasına “Panionios”da başlayıb. 4 mövsüm (2001-2005) bu klubda çıxış edən hücumçu 70 oyunda 15 qola imza atıb. 2005-ci ildə Yunanısyanın böyük klublarından biri olan “Panatinaikos”a keçən futbolçu 6 il (2011-ci ilə qədər icarə fasilələri ilə birlikdə) 68 oyun keçirib.
Mantsios 2008-ci ildə Almaniyanın “Ayntraxt” (10 oyun, 1 qol), 2010-cu ildə Cənubi Kiprin “Anortosis” (14 oyun, 9 qol) və 2011-ci ildə Portuqaliyanın “Maritimo” (1 oyun) klublarına icarəyə verilib.
29 yaşlı forvard 2011-2012-ci illər mövsümündə OFİ Krit klubunun şərəfini qoruyub. Mantsios ada təmsilçisinin heyətində 22 oyuna çıxıb, 7 qola imza atıb.
Cari mövsümdən etibarən "Bakı"nın heyətinə cəlb olunan Vangelis Mantsiosun boyu 191 sm. şəkisi 81 kiloqramdır. Mantsios 2006-cı ildə Yunanıstan milli komandasının heyətində debüt edib və milli formada 7 oyun keçirib.