“Hakimin qərarına matç ərzində və sonra şərh vermək futbolçunun işi deyil”
“AZAL-la oyun çox gərgin və çətin keçdi – bizim üçün də, rəqib üçün də. Oyunun nəticəsini tam ədalətli hesab edirəm. Çünki həqiqətən komanda şəkilində çox maraqlı oyun göstərdik”.
Bu sözləri Korner.az-a açıqlamasında “Rəvan”ın futbolçusu Tural Axundov deyib.
Axundov bildirib ki, oyunun gərginliyi psixoloji cəhətdən hətta final fiti səsləndikdən sonra da hiss olunur: “Psixoloji cəhətdən böyük gərginlik keçirtdim, üstəgəl, yorğunluq. Müxbirlər tərəfindən verilən suallara hər zaman adekvat və obyektiv cavab vermək olmur. AZAL-la oyun buna misaldı. Mən həqiqətən əvvəlcə qeyd etdiyim səbəblər və qələbə sevinci səbəbindən fikirlərimi düzgün ifadə edə bilmədim. Hakim oyun ərzində hamı kimi yorulur və çox əziyyət çəkir. Haqsızlıq olar onun ünvanına ədalətsiz və düşünülməmiş fikir söyləmək. Hakimin qərarına matç ərzində və sonra artıq şərh vermək futbolçunun işi deyil, bunu artıq anladım”.
