“Qəbələ”nin baş məşqçisi Yuri Syomin Premyer Liqanın XXI turu çərçivəsində “Xəzər Lənkəran”a qarşı keçirilmiş oyundan (2:3) sonra azarkeşlərlə yaranmış qarşıdurma haqda yayılmış məlumatı təkzib edib.
Korner.az-ın məlumatına görə, rusiyalı mütəxəssis İTAR-TASS-a danışıb.
“Bu haqda ilk dəfə eşidirəm. Bu, yanlış məlumatdı. Oyundan sonra heç bir asayiş pozuntusu olmayıb. Hər şey sakit idi” deyə Syomin bildirib.
Məşqçi həmçinin Marat İzmaylovun oyunu haqda da danışıb və komandanın ardıcıl iki məğlubiyyətini dəyərləndirib: “Marat həm özünü yaxşı hiss edir və həm də kifayət qədər yaxşı oynayır. İkinci dəfə ardıcıl məğlubiyyət, işin xüsusiyyətidi. Biz liderlər qrupundan geri qalmadıq. Azərbaycan çempionatında bütün mübarizə hələ qarşıdadır. Heç kim də təxmin etmirdi ki, “Qəbələ” həmişə qələbə qazanacaq. Bizim tam yeni komandamız və çoxlu yeni futbolçularımız var. Hər şey plan üzrə gedir”.
