“Yuri Syomin Rusiya futbolu üçün önəmli simadır. Bu mənada ona bu ölkənin klubu tərəfindən maraq göstərilməsi məntiqlidir”.
Korner.az-ın məlumatına görə, bu sözləri “Qəbələ”nin çalışdırıcısı Yuri Syominin Moskva “Spartak”ının baş məşqçi vəzifəsinə namizəd olması ilə bağlı xəbərləri şərh edən təcrübəli mütəxəssisin nümayəndəsi Dmitri Selyuk deyib. “İzvestiya” qəzetinə açıqlamasında o bildirib ki, Syomin həm “Qəbələ”dəki, həm də digər komandalardakı işi ilə özünün yüksək məşqçilik səviyyəsini sübut edib.
“Təsadüfi deyil ki, Kiyev “Dinamo”sundan getdikdən sonra bu komanda Çempionlar Liqasına da düşə bilməyib” – deyən Dmitri Selyuk əlavə edib ki, Rusiyaya qayıtmaq Syominin planlarına daxildir: “Hər halda uzun müddətdir ailəsindən kənarda qalmaq onun üçün ağırdır. Rusiyada Syominə etimad özünü doğruldub. Amma indiki halda onun hansı komandaya qayıdacağını demək çətindir”.
Dmitri Selyukun sözlərinə görə, cari mövsümün sonu Syominin “Qəbələ” ilə müqaviləsi başa çatır: “Amma mövcud müqavilə onun əməkdaşlığı daha bir il müddətinə uzatmasına imkan verir. Syomin “Qəbələ”də qalıb-qalmaması tərəflərin istəyindən asılı olacaq. Rusiyalı məşqçini hazırkı klubunda hər şey qane edir. Amma bir çox nüans da var. Azərbaycan kubokunun final oyunundan sonra “Qəbələ” rəhbərliyi ilə görüş olacaq, bundan sonra Syominin qalıb-qalmaması məsələsi həllini tapacaq”.
