Türkiyə Superliqasında daha bir baş məşqçi istefası baş verib.
Korner.az-ın məlumatına görə, “Kasımpaşa”nın çalışdırıcısı Şota Arveladze postunu tərk edib.
Superliqanın 24-cü turu çərçivəsində ötən gecə “Konyaspor”la qarşılaşmadan (1:2) sonra bu qərarı verən gürcü mütəxəssis “Lig TV”yə açıqlamasında istefasının səbəbini açıqlamayıb: “Fair play” epizodu haqda çox danışmaq istəmirəm. Mənim yerimdə kim olsa, eyni cür edərdi. Bizə yaraşan budur. Oyundan sonra klub rəhbərliyi ilə danışdım və istefa vediyimi dedim. Hər kəsə uğurlar arzulayıram”.
Qeyd edək ki, oyunun 19-cu dəqiqəsində meydan sahiblərinin oyunçusu Ryan Babelin zədələnməsinə baxmayaraq, qonaq komandanın futbolçuları topu kənara atmayıblar.
Bu azmış kimi, “Kasımpaşa”nın müdafiəçisi Ryan Donk hesabı açıb. Onun gözlənilməyən qoluna görə “Konyaspor”un futbolçuları hakimə və R.Donka etirazını bildiriblər.
Bundan sonra “Kasımpaşa”nın baş məşqçisi Şota Arveladze oyunçularına rəqibin hücumunun qarşısını almamağı tapşırıb. Oyuna mərkəzdən başlayan “Konyaspor”un hücumçusu Hasan Kabze topu boş qapıdan keçirərək hesabı bərabərləşdirib. Matçın 40-cı dəqiqəsində isə H.Kabze penaltidən ikinci qolu vurub.
Rusiya mətbuatı Arveladzenin məhz bu qərarına görə istefaya göndərildiyini iddia edir.
