Çempionlar Liqasının təsnifat mərhələsində “Neftçi”yə rəqib olacaq Albaniyanın “Skenderbeu” klubunun nigeriyalı futbolçusu Nuredin Orelesi Albaniya mətbuatına müsahibə verib.
Korner.az 24 yaşlı cinah yarımmüdafiəçisinin müsahibəsini qısa ixtisarla təqdim edir.
– Oyuna çox az qalıb. Komandada əhval-ruhiyyə necədi?
– Əlbəttə, Çempionlar Liqasında oynamaq tam başqa hissdi, məsuliyyəti də ağırdı. Komanda həm fiziki, həm də psixoloji cəhətdən əla görünür. Biz mərhələ keçmək məqsədinə köklənmişik və bunun öhdəsindən gələcəyik.
– “Neftçi” büdcəsinə görə “Skenderbeu”nu geridə qoyur. Bu amil oyuna təsir edə bilərmi?
– Biz bunu dərk edirik. “Neftçi” elə komandadı ki, 2 milyon avroluq futbolçuyla da heyətini bəzəyə bilər. Ancaq bu. Bizim üçün heç nəyi dəyişmir.
– “Neftçi” “Skenderbeu” üçün keçiləcək rəqibdi?
– Biz “Neftçi”ylə 2 il bundan əvvəl yoldaşlıq oyununda qarşılaşmışdıq və o oyun 1:1 hesabıyla bitmişdi. Deyə bilərəm ki, çox səviyyəli oyunçuları var. Bu, özünü 3 il ardıcıl Azərbaycan çempionu olmaqlarında da göstərir. Ancaq biz də çempionuq və o oyundan sonra xeyli güclənmişik. Belə deyək: iki eynui səviyyəli komanda üz-üzə gələcək.
– Komandaya 5 yeni oyunçu alınıb. Onlar komandanı nə dərəcədə gücləndiriblər?
– “Skenderbeu” 3 il bundan əvvəl də güclü idi, iki bundan əvvəl də, indi də. Yeni transferlər isə qələbə istəyinin artmasına görədi. Komandaya Qilman Lika, Sefa və Morin kimi döyüşkən futbolçular qoşulub. Eyupi ilə Abbası da unutmaq olmaz.
– Sebino Plakunun gedişindən sonra komandanın taktiki düzülüşündə dəyişikliklər edildi. Yeni sxemdən xəbərin var?
– Mən əvvəl də demişdim, Plakunun gedişi bizim üçün çox böyük itkidi. O, hər an oyunun gedişatını dəyişə biləcək oyunçudu. Ancaq klub rəhbərliyi komandada elə rəqabət yaradıb ki, bu vəziyyətdən də çıxış yolunu çox axtarmaq lazım gəlmədi. Baş məşqçimiz Mirel Yosa çox güclü yarımmüdafiə xətti qurub və mənim fikrimcə, biz “Neftçi”dən məhz bu xətdə üstünük.
Avrokuboklardakı ilk iki ildə hansı səhvləri buraxdığımızı indi daha yaxşı bilirik. Məncə, biz Azərbaycan komandasını keçə biləcək gücdəyik. Bu, əsl gücümüzü göstərmək üçün bir şansdı.
