UEFA Avropa Liqasının II təsnifat mərhələsi çərçivəsində səfərdə İsrailin "Makkabi" klubu ilə qarşılaşacaq "Xəzər Lənkəran" ölkəmizdəki son məşqini Tofiq Bəhramov adına Respublika stadionunda keçdi.
Korner.az-ın xəbərinə görə, 2 saat davam edən məşq əsasında Hayfada "Makkabi" ilə oyunun start heyətində hansı futbolçuların yer alacağını təxmin etmək olar.
Məşqin sonunda futbolçular iki komandaya – "göylər" və "sarılar"a bölünərək hər hissəsi 15 dəqiqə olan oyun keçirdilər. Məşq zamanı digərlərinə nisbətən Elnur Abdullayev, Uğur Pamuk daha ləng görünürdü. Hətta sonuncu məşqi sona kimi davam etdirə bilmədi. Pamukla söhbətimizdə aydınlaşdırdıq ki, "Sumqayıt"dan Cənub klubuna transfer olunan futbolçu özünü pis hiss edir və buna görə Toşakdan icazə alaraq məşqi kənardan izlədi. Maraqlıdır ki, gənc futbolçu "özümü pis hiss edirəm" – desə də, kənardan şən halda komanda yoladşlarını izləyirdi.
Ümumilikdə isə Rasim Ramaldanov, Uğur Pamuk, Elnur Abdullayev Toşakın keçdiyi məşq prosesinin sərtliyinə öz "şikayətlərini" bildiridilər. Ramaldanovun – "Biz hələ sabaha kimi burdayıq" – deməsini xüsusi qeyd etmək lazımdı. Lakin "Simurq"dan transfer olunan futbolçunun məşqdə daha aktiv olması diqqətdən yayınmırdı.
"Ağ-yaşıllar"ın Hayfada meydana hansı heyətlə çıxacağına gəlincə, düşünmək olar ki, təxmini heyət belə olacaq:
Qapıçı: Toni Doblas
Müdafiəçilər: Rasim Ramaldanov, Elnur Allahverdiyev, Alvaro Sİlva, Adrian Skarlatake, Vanderson Skarduelli
Yarımmüdafiəçilər: Sadio Tounkara, Marin Orsuliç, Zohair Benuahi, Nikola Qliqorov
Hücumçu: Junior Nildo
Sonda onu da qeyd edək ki, Toşak "Makkabi" ilə oyunda Elnur Abdullayevin xidmətindən yararlana bilməyəcək.
Səxavət QURBANOV
