“Qarabağ”ın qapıçısı İbrahim Şehiçin Bosniya və Herseqovina millisindən erkən qayıtmasının səbəbinə aydınlıq gəlib.
Korner.az-ın məlumatına görə, təcrübəli qolkiper zədəli olduğu üçün yığmasının düşərgəsini vaxtından tez tərk edib.
Avro-2016-nın seçmə mərhələsində martın 28-də Andorra ilə (3:0) qarşılaşmada ehtiyatda qalan Şehiç növbəti görüşü gözləmədən Azərbaycana qayıtmışdı. Halbuki bosniyalılar bundan 3 gün sonra Avstriya ilə (1:1) yoxlama matçı keçirəcəkdilər.
Bosniya və Herseqovina mətbuatı “Qarabağ”ın daha vacib oyunu olduğu üçün Şehiçin yığmanın məşqçilər korpusundan icazə alaraq Azərbaycana qayıtdığını yazmışdı. Lakin əsl səbəb qolkiperin əlində yüngül zədəsinin olmasıdı.
Klubdan aldığımız məlumata görə, 27 yaşlı qapıçının zədəsi artıq sağalıb və o, bu gün “İnter”lə Premyer Liqa matçında baş məşqçinin ixtiyarında olacaq.
