"Xəzər Lənkəran"ın kapitanı Rahid Əmirquliyevin Korner.az saytına müsahibəsi.
– Artıq Avroliqadakı rəqibiniz məlumdu. I təsnifat mərhələsində Maltanın “Slima” klubu ilə qarşılaşacaqsınız. Püşkün nəticəsini necə dəyərləndirərdin?
Sözün düzü, mənim o komanda haqda heç bir məlumatım yoxdu. Mən heç elə bir komanda tanımıram. Ancaq futbolda zəif komanda yoxdu. Ona görə rəqibimizə hörmət etməliyik. Bizim hədəfimiz Avroliqanın qrup mərhələsinə düşməkdi. Yaxşı futbolçularımız var və hədəfimizə nail olmağa gücümüz də çatar. Bu cür rəqibləri məğlub etməliyik.
– Yəqin ki razılaşarsan, püşk "Xəzər Lənkəran"a avrokuboklarda bu qədər zəif komanda nəsib etməmişdi.
Yenə deyirəm, futbolda zəif komanda deyilən bir şey yoxdu. Bu komanda haqda heç nə bilmirəm. Yadımdadı, Moldovanın "Olimpiya" klubu bizə Avroliqada düşəndə deyirdilər zəifdi. Ancaq onları keçə bilmədik.
– Ancaq gəl real danışaq. "Slima"nı da keçə bilməyən komandanın avrokuboklarda nə işi var?
Bu sizin fikirinizdi. Futbolda hər şey ola bilər.
– İlk oyunu səfərdə keçirəcəksiniz. Bunu "Xəzər Lənkəran" üçün əlavə üstünlük saymaq olarmı?
Tam deməzdim üstünlükdü. Təbii ki, ilk oyunu səfərdə keçirmək yaxşıdı. Çalışacağıq ki, cütün taleyini elə ilk oyunda həll edək.
– "Xəzər Lənkəran" azarkeşləri qitə miqyaslı oyunlarda qələbə sevinclərindən az dadıblar. Onlar "acdı" desək yanılmarıq. Bu dəfə onların arzularını reallaşdıra biləcəyinizə əminsinizmi?
İnşallah, qələbələrimizlə onları yenə sevindirəcəyik. Biz qrupa düşmək üçün oynayırıq və buna gücümüz də var.
