Artıq 2013-cü il geridə qalmaq üzrədi. Hər olduğu kimi `Qarabağ` Futbol Klubu ilin ən yaxşılarını seçib. Ənənəvi olaraq sorğuda klubun idari, texniki və inzibati heyəti qatılıb. 2013-də meydana çıxan 20 futbolçunun seçilmə imkanı olub (2013-ün ilk yarısında “Qarabağ”da çıxış edənlər səsverməyə daxil edilməyib). Öncədən müəyyənləşmiş 20 futbolçu 20 ballıq şkalayla qiymətləndirilib. Yəni, 20-ə qədər xal 20 futbolçu arasında paylaşdırılıb. Klubun direktoru Emrah Çelikel və baş məşqçi Qurban Qurbanovun da qatıldığı sorğu olduqca maraqlı alınıb. Maraqlıdı ki, ötən illərə müqayisədə bu dəfə qalib böyük fərqlə qələbə qazanıb. Bəli, gözlənildiyi kimi “Qarabağ”ın braziliyalı forvardı Reynaldo klub çalışanlarının rəğbətini qazanaraq ilin ən yaxşısı seçilib. Rekord səslə birinci olan 24 yaşlı hücumçu 1 isitisnayla hərkəsdən maksimum xal alıb. Reynaldo elə ilin əvvəlində komandaya qoşulub. “Anderlext”dən transfer edilən ön xətt oyunçusu ilin ilk yarısında cəmi 2 qol vursa da, həm kubok, həm də çempionatda hücum xəttində effektliliyi ilə komandaya böyük fayda gətirib.
Korner.az-ın məlumatına görə, bu mövsümə isə fırtına kimi başlayan Reynaldo avrokuboklarda 5, premyerliqada 7, kubokda isə “Qarabağ”ın ¼ finala yüksəlməyinə səbəb olan yeganə qola imza atıb. 2008-ci ildən keçirilən sorğuda Admir Teliden sonra il sonunda klub çalışanlarının rəğbətini qazanan 2-ci əcnəbi olub.
2-ci və 3-cü yerlər arasında isə ciddi mübarizə qeydə alınıb. Ötən il 3-cü olan Riçard Almeyda 2-ciliyi sadəcə 2 xalla Rəşad Sadıqovu qabaqlamaqla əldə edib. İlk 5-liyi isə ötən ilin qalibi Vüqar Nadirovla Qara Qarayev tamamlayıb.
