Beynəlxalq Futbol Tarixi və Statistikaları Federasiyası (İFFHS) dünyanın ən güclü klublarının reytinq siyahısını açıqlayıb.
Korner.az-ın məlumatına görə, 10 aylıq fasilədən sonra yenidən fəaliyyətə başlayan İFFHS-nın açıqladığı siyahıda dünyanın 200 klubu yer alıb.
Geridə qalan 2013-cü ilin nəticələrini əks etdirən siyahıda Azərbaycan yalnız bir klubla təmsil olunub. Ötən mövsüm Avropa Liqasının pley-off mərhələsinə qədər irəliləyən Ağdamın “Qarabağ” klubu 119,50 xalla 111-ci pillədə qərarlaşıb.
Qurban Qurbanovun komandası “Liverpul”, “Everton”, “Nyukasl” (hamısı İngiltərə), “Flamenqo”, “Botafoqo” (hər ikisi Braziliya), “Marsel” (Fransa), CSKA (Moskva, Rusiya), “Anji” (Rusiya) və “Volfsburq”, “Ştutqart” (hər ikisi Almaniya) kimi klubları geridə qoyub.
Siyahıya isə ötən mövsüm bütün titulları qazanan Almaniyanın “Bavariya” klubu (370 xal) başçılıq edir. Madrid “Real”ı (290 xal) ikinci, “Çelsi” klubu (273 xal) isə siyahıda üçüncü olub.
