1985-1986-cı illədə “Neftçi”nin qapısını qorumuş Vyaçeslav Çanov Moskva MOİK-inin əsas komandasındakı işindən yaşının çox olmasına görə azad olunub.
Korner.az-ın məlumatına görə, bu barədə veteran futbolçu Rusiya mətbuatına müsahibəsində bildirib.
Hazırda klubun akademiyasında çalışan Çanov deyib ki, əsas komandadakı qapıçılarla iş üszrə məşqçi işindən məhz yaşının çox olmasına görə azad olunub: “Ötən ilin iyulundan akademiyada işləyirəm. Əsas komandadakı işimi itirməyim böyük zərbə idi. Bilirsiz, bu elə bir haldır ki, onun baş verəcəyini hər an gözləyirsən, amma baş verəndə istər-istəməz pis təsir edir. Düzdür, bu gün də özümü qoca hiss eləmirəm. Hətta Vaqner Lav bir dəfə təəccüblə dedi ki, inanılmazdır, siz bu yaşda hələ də topa tullanırsız, yıxılırsız. Mən də dedim ki, yıxılmaq asandır, əsas məsələ yıxıldıqdan sonra ayağa dura bilməkdir. Amma nə etməli, əsas məsələ pasportdur, orda da yaşım 63-dür. Mənə dedilər, vaxtın keçib, qocalmısan və əsas komandadakı işimdən azad etdilər. Buna da razılaşmağa məcbur idim. İpoteka borcum var, onu ödəməliyəm. Xoşbəxtlikdən borcum rublladır. İşdən azad olunduğumu klubun baş direktoru Roman Babayev dedi. “Lokomotiv”lə “qızıl oyun”dan bir neçə gün sonra zəng edib görüşmək istədiyini dedi. Nə məqsədlə görüşmək istədiyini dərhal anladım”.
Qeyd edək ki, Çanovu əsas komandada Sergey Ovçinnikov əvəzləyib.
