Türkiyə PTT I liqasında XXV turun oyunları keçirilib.
Korner.az-ın məlumatına görə, millimizin qapıçısı Kamran Ağayevin formasını geyindiyi “Kayserispor” yığmamızın sabiq müdafiəçisi Rail Məlikovun komandası “Dənizlispor”un qonağı olub.
Rail Dənizli klubunda yenə “18-lik”də yer almamışdısa, “Kayserispor”un qapısını məhz Kamran qoruyub. Görüşdə hesabı meydan sahibləri açıblar. Genkovun 9-cu dəqiqədəki qoluna Mərt Nobre 60 və 82-ci dəqiqələrdə vurduğu 2 qolla cavab verib. İbrahim Dağaşanın 90+5-ci dəqiqədə vurduğu qol isə “Kayserispor”a 3:1 hesablı qələbə qazandırıb.
Beləliklə, Kamran Ağayevin qapıda durduğu 4-cü oyunda da “Kayserispor” qələbəyə sevinib. Millimizin qolkiperi yeni klubunda ilk dəfə qapısında qol görüb.
Qeyd edək ki, bu qələbədən sonra xallarının sayını 53-ə çatdıran “Kayserispor” liderliyini davam etdirib. “Dənizlispor” isə 21 xalla turnir cədvəlinin 17-ci pilləsində qərarlaşıb.