“Kəpəz” daha bir gənc mütəxəssisə əmanət olunub. Azər Məmmədov köməkçiləri Anar Kələntərov və Tariyel Hüseynovla birlikdə “sarı-göylər”i düşdüyü böhranlı durumdan çıxarmalıdı.
Korner.az-ın məlumatına görə, bu baxımdan Məmmədovun üzərinə ağır bir işin düşüb. Futbol oynadığı vaxtlarda azarkeşlərin “böyük kapitan” ləqəbi verdiyi məşqçi sələfi Vidadi Rzayevin bacarmadığı vəzifənin öhdəsindən gəlməklə komandanı xilas etməlidir. Bu isə indiki məqamda olduqca çətin görünür.
Azər Məmmədov- “Kəpəz”in baş məşqçisi: “Doğrudan da, çətin və məsuliyyətli işdir. Hamı baş məşqçi olmaq istəyər. Amma baş məşqçi olmaq klubda böyük vəzifədə olmaq deyil. İşin ağırlığı həddindən çoxdu. Mən bunu dərk etmişəm. Mən elə fikirləşirəm ki, “Kəpəz” kimi komandanın baş məşqçisi olmaq sevindiricidir”.
Futbolçu karyerasını bu il başa vuran Azər Məmmədov yanvar ayından məşqçiliyə başlayıb. O, əvvəlcə “Kəpəz”in əvəzedici heyətində, bu mövsümdən isə əsas komandada baş məşqçi köməkçisi kimi çalışıb. Məmmədov C kateqoriyasına malikdi. Dekabrda isə B lisenziyasına yiyələnəcək.
Azər Məmmədov- “Kəpəz”in baş məşqçisi: “Baş məşqçi olaraq ilk addımlarımı atıram. Mənə çox adam deyir ki, “komandanın vəziyyəti pis idi, sən tələsdin”. Ancaq bununla razılaşmıram. Nəyə görə? Çünki əvvəl-axır bir addım atmaq lazımdı. Mənim indi qabağa atılmaq vaxtım idi. Peşman da deyiləm. Allahın köməkliyi ilə çalışacağam göstərim ki, mən bura gəlməkdə yanılmamışam”.
“Kəpəz”in 37 yaşlı yeni baş məşqçisinin postunda debütü noyabrın 24-nə təsadüf edəcək. Azər Məmmədov həmin gün doğma divarlar arasında komandasını Qusarın Şahdağ klubu ilə görüşə çıxaracaq.
xemsefans.com
