Topaz Premyer Liqasının 24-cu turunda "Bakı"ya minimal hesabla məğlub olan “Simurq” "Qəbələ" ilə oyunun hazırlıqlarına ara vermədən başlayıb.
Korner.az-ın klubun saytına istinadən verdiyi məlumata görə, dünən bir məşqə çıxan Georgi Çixradzenin yetirmələri, qısa məsafəli qaçış və isinmə hərəkətlərindən sonra iki qrupa bölünüb. Daha sonra əsas heyətdə qarşılaşmaya çıxan futbolçulara istirahət verilib, digərləri isə "kvadrat" və ikitərəfli oyunla hazırlılığı tamamlayıb.
Bu gündən isə "Simurq" iki məşqlə hazırlığı davam etdirəcək. Səhər çalışmaları trenajor zalında keçiriləcək, axşam məşqi isə Zaqatala şəhər stadionunda baş tutacaq. Komandanın heyətində zədəli futbolçu olmasa da, kart cəzalılarının çoxluğu "Qəbələ" ilə oyun öncəsi məşqçilər korpusunu çətin vəziyyətə salıb. Mario Bojiç və Qərib İbrahimov son görüşdə dördüncü sarı vərəqəni aldıqlarından, növbəti turda meydana çıxa bilməyəcəklər. "Bakı" ilə qarşılaşmada dizindən zədə alan qapıçı David Pietrzkeiviçin durumu isə qənaətbəxştdir. Polşalı əlcək ustası bu günkü məşqlərdə iştirak edəcək.
Qeyd edək ki, "Qəbələ" – "Simurq" oyunu aprelin 5-də baş tutacaq.
