Topaz Premyer Liqasının 25-ci turuna AZAL – “Turan” qarşılaşması ilə yekun vuruldu. Hər hissədə rəqib qapısından bir qol keçirən “təyyarəçilər” 2-0 hesablı qələbə qazandı.
Korner.az oyundan sonra keçirilən mətbuat konfransında hər iki klubun baş məşqçilərinin səsləndirdiyi fikirlərlə sizi tanış edir.
Vaqif Sadıqov, AZAL klubunun baş məşqçisi: “Hər bir oyun bizim üçün vacibdir, qələbə qazanmalıyıq. Bu il ilk dəfədir ki, “Turan”ı məğlub etdik. Qələbə, təbii ki, xoşdur. Oyun boyu qol imkanlarımız çox oldu, hamısından yararlana bilmədik. Hər oyunda 3-4 oyunçu itiririk. Con Oluremi komandaya gələndə fiziki durumu yaxşı deyildi, lakin onun potensialı nəzərə alıb müqavilə imzaladıq. Özünü doğrultmağa başlayır”.
Əfqan Talıbov, “Turan” klubunun baş məşqçisi: “Səfərdə oynamağımız komandaya mənfi təsir edir. Komanda azarkeş dəstəyindən də məhrum olur. Heyətdə çoxlu gənc futbolçularımız var. Gələcəkdə onlara üstünlük verməyə çalışacağıq. Budaq Nəsirov bu gün özünü yaxşı tərəfdən göstərdi. AZAL yaxşı komandadır, pressinqlə oynayır. Heyətində təcrübəli futbolçular var. AZAL-ın qol imkanları bizdən çox oldu. Biz isə yaratdığımız dörd imkandan heç birini reallaşdıra bimədik. Kamal Bayramov zədəli olmasına baxmayaraq çox top çıxardı. Salif Ballo təhlükəli hücumçu olsa da, tək oynamağa çətinlik çəkir, təcrübəsi çatmır. Hər şey maddi durumumuzdan asılıdır, sponsor axtarışındayıq. Stadionumuz düzəldikdən sonra doğma meydanda əsl “Turan” kimi oynayacağıq”.
