Çempionlar Liqasına hazırlığını davam etdirən "Neftçi" bu gün Avstriya toplanışı çərçivəsində ikinci yoxlama oyununu keçirib.
Korner.az xəbər verir ki, “ağ-qaralar”ın rəqibi Rumıniyanın “Dinamo”su (Buxarest) olub.
Hər hissədə bir qol vuran "Neftçi" qələbəyə sevinib. Komandanın qollarına Cavid İmamverdiyev (34) və Julius Vobay (55) imza atıb.
Qeyd edək ki, “Neftçi” Avstriyadakı hazırlıq prosesi çərçivəsində ilk oyununu Rusiyanın “Kuban” (Krasnodar) komandasına qarşı keçirmiş və 0:2 hesabıyla məğlub olmuşdu. Türkiyə toplanışı zamanı isə “ağ-qaralar” Rusiyanın “Mordoviya” klubuna 0:4 hesabıyla uduzmuş, İran çempionu “Sepahan”a qalib gəlmişdi – 1:0.
