Bu gecə Dünya çempionatının təsnifat mərhələsi çərçivəsində Rumıniyanı səfərdə məğlub etmiş Türkiyə millisinin çalışdırıcısı Fatih Terim matçdan sonra maraqlı açıqlamalar verib.
Korner.az-ın məlumatına görə, "İmperator" komandasından tam razı qaldığını ifadə edib.
"Vallah, belə oyunlara kəndirbaz olmaq lazımdı. Heç-heçə və ya məğlubiyyət təqdirində final mərhələsinə vəsiqəni tam əldən verə bilərdik. Uşaqları təbrik edirəm. İki şey çox əhəmiyyətlidi: ya matçı qazanmaq, ya da təqdir qazanmaq. Futbolçularım ikisini də qazandılar. İzləyənlər "hop oturub hop qalxdılar". "İlk 11-liyi" indi-indi qururuq. Bu uşaqları buralara qədər gətirən digər yoldaşlara təşəkkürlər. Biz yalnız 10 gündür burdayıq. Ölkənin buna ehtiyacı vardı. İki matçı keçdik. Allah hər kəsin əməyinin qarşılığını verir. Uşaqlar da çalışdılar bu gün. Allah yolumuzu açıq etsin. Söhbətdə bayraq varsa, milli forma varsa, İstiqlal Marşı varsa, heç kimin hətta kiçik bəhanələri də qalmamalıdı. Təkcə fuitbolçularla olmaz bu işlər. Hər kəsin milliyə faydalı olması lazımdı. Hər kəsin ürəyinin milli komanda üçün döyünməsi lazımdır. İnşallah, Dünya çempionatına gedərik. Bizim hələ də şansımız çox deyil. Daha çətin matçlarımız var. İpdən düşmədən davam etməliyik. "Pardon" deməməliyik. Türk xalqına təşəkkür edirəm. Onsuz da bir çox problemimiz var. Milli komanda hər kəsin komandasıdı", – deyə Terim bildirib.
