"Neftçi"nin gənc futbolçusu Elvin Yunusovun Korner.az-a verdiyi müsahibə.
-"Neftçi" tarix yazdı və artıq qrup mərhələsində oynayacaq. Rəqiblər elə də asan deyil. Azarkeşlər “Rubin”, “İnter", və “Partizan”la oyunlarda nəyə ümid etsin?
Artıq “Neftçi”yə inanmağın vaxtıdı. İndidən necə olacağını demək olmaz. Amma sözsüz ki, biz inanırıq özümüzə. Məşqçilərimiz də inanırlar. İnşallah, yaxşı olacaq.
– “Neftçi”yə bu heyətlə bir neçə cəbhədə vuruşmaq çətin olmayacaqmı?
Əlbəttə, çətin olacaq. Amma inanıram ki, bunların öhdəsindən gəlmək üçün komandada yetərincə futbolçu var. Həm də bu biz cavanlar üçün böyük şansdır. Çox oyun olanda meydana çıxmaq üçün çox şansımız olur.
– APOEL-i Kiprdə məğlub etdikdən sonra belə bir söz-söhbət yarandı ki, guya bu danışılmış oyundur. Bu iddialara fikrini bilmək istəyərdim.
Bunlar sadəcə bizi gözügötürməyənlərin şayiəsidi. Ona görə də kölgə salmaq istəyirlər. Ancaq hər şey göz qabağındadı. Belə şeylərə fikir vermək lazım deyil.
– Millinin son iki oyunu haqda nə deyə bilərsən?
Məncə, İsraillə oyundakı kimi oynamadılar. Əlbəttə, başa düşürəm, Portuqaliya daha güclüdü. Ancaq İsraillə oynadığımız kimi oynasaydıq, bəlkə də müqavimət göstərmək olardı.
– Millinin heyətində Avropa Liqasına vəsiqə qazanmış Elvun Yunuszadə, Cavid İmamverdiyev Rəşad Sadiqov kimi adlar yoxdu. Bunun səbəbi nə ola bilər?
Bu mənim özümə də təəcüblüdü ki, Avroliqaya vəsiqə qazanan komandadan niyə bir nəfər də olsun milliyə çağırılmır? Amma yenə də bu barədə son sözü baş məşqçi deyir.
– Nə vaxtsa milliyə çağırılacağını gözləyirsənmi?
Əlbəttə . Çox istəyirəm bunu. Görək məşqçi nə qərar verəcək.
– Artıq “Böyük oyun”a sayılı günlər qalıb. “Xəzər-Lənkəran”la oyuna hazırsınızmı?
Digər oyunlara hazırlaşdığımız kimi, bu oyuna da hazırlaşırıq. Əlbəttə ki, kiminlə oynamağımızdan asılı olmayaraq, meydana qalib gəlmək üçün çıxacağıq.
RÖYA KƏRİMLİ
