“Xəzər Lənkəran”, “Neftçi” və “Qəbələ”dən sonra daha bir klub hakimlikdən narazı qaldığını rəsmən açıqlayıb.
Korner.az-ın məlumatına görə, “İnter” AZAL-la oyunun hakim idarəçiliyində müşahidə etdiyi epizodları rəsmi səhifəsində yerləşdirib.
Həmin açıqlamanı və video-görüntünü təqdim edirik:
“Məlum olduğu kimi, Premyer Liqanın 3-cü turunda “İnter” “Şəfa” stadionunda AZAL komandasını qəbul etdi. Bu görüş komandamızın 1:2 hesablı məğlubiyyətilə başa çatdı. Lakin bu məğlubiyyət bir çox hallarda matçın baş hakiminin birmənalı olmayan qərarlarının nəticəsində baş verdi.
“İnter” – AZAL matçında referinin qonaq komandanın xeyrinə təfsir etdiyi mübahisəli epizodlarıyla sizi tanış etmək istəyirik:
1. Qonaqların vurduqları birinci qolda eyni anda iki qayda pozulmuşdu. Öncə qonaqların futbolçusu “İnter”in qapıçısı Georgi Lomayanın qapıçı sahəsinə kobud şəkildə hücum etdi, ancaq məlum olduğu kimi, qapıçı sahəsində qolkiperə istənilən təmas qayda pozuntusu kimi qiymətləndirilir. AZAL-ın futbolçusu topa toxunan anda komandanın digər oyunçusu Viktor İbekoyi topu qapıya yönəltdi, lakin aydın görünür ki, Lomaya ilə mübarizə aparan futbolçu tərəfindən top ona ünvalanan zaman İbekoyi oyundankənar vəziyyətdə idi. Beləliklə, qonaqlar bir hücumda iki dəfə qaydanı pozmuşdular, ancaq bütün bunlar hakimə qolu qeydə almasına mane olmadı.
2. Birinci hissənin gedişində AZAL-ın cərimə meydançasında daha bir mübahisəli epizod yadda qaldı. Belə ki, Baçana Tsxadadze başıyla topu Vaqif Cavadova ötürdü, futbolçu topu saxlamağa və dönməyə çalışdı, lakin qonaqların müdafiəçisi sözün tam mənasında onun qolundan yapışdı və bir neçə saniyə sonra Cavadovu yerə sərdi. Ancaq bu epizoddan təqribən 10 metr uzaqlıqda olan hakim buna hər hansı bir reaksiya göstərmədi.
3 .Vaqif Cavadovla bağlı daha bir epizod ikinci hissədə baş verdi. “İnter”in futbolçusu sol cinahdan keçdi, sonra isə topu rəqibin cərimə zərbəsinə ötürdü, lakin AZAL-ın oyunçusu əlinin köməyilə ötürmənin qarşısını aldı. Bu dəfə də hakimin fiti susdu. Bu epizodda hakim doğru mövqe tutmamışdı və ədalət naminə demək lazımdı ki, o, həmin epizodu çətin dəqiq qiymətləndirə bilərdi. Bununla belə, bu, ona bəraət qazandırmır.
4. İkinci hissəyə əlavə edilmiş vaxt gedir. AZAL-ın qapıçısı çıxışda ayağını dizinə qatlayaraq önə çıxarmışdı. Bu hərəkətilə qapıçı komandamızın futbolçusu İvan Benitesə ciddi xətər yetirə bilərdi. Yəqin 2011-ci ildə, “İnter” – “Bakı” komandaları arasında keçirilən matçda Georgi Lomayanın eyni hərəkətinə görə qapımıza penalti təyin edilməsini xatırlayırsınız. O zaman bəzi futbol mütəxəssisləri və hakimlər qapıçımıza çıxışda doğru oynamağı öyrədirdilər. Maraqlıdı, indi onlar bu epizodla bağlı nə deyəcəklər?”
