“Cavid İmamverdiyev uzun müddətdi zədədən əziyyət çəkirdi. Bu gün var gücüylə oynaya bilmədisə, bunda heç kimin günahı yoxdu”.
Korner.az-ın məlumatına görə, bu sözləri Avropa Liqasının qrup mərhələsi çərçivəsində keçirilmiş “Neftçi” – “Partizan” oyunundan sonra təmsilçimizin baş məşqçisi Böyükağa Hacıyev deyib.
Hacıyev bildirib ki, Emin Mehdiyevlə Tərlan Quliyev Mahir Şükürov-Ramos cütlüyünü layiqincə əvəzləyib: “Birinci hissədə əlimizə düşənm fürsətləri dəyərləndirsəydik, nəticə başqa olardı. Futbolda vurmayana vururlar. Səhvlərimizin üzərində işləyib nəticə çıxaracağıq. İndi əsas diqqəti daxili çempionata verəcəyik. Çempion olsaq, gələn mövsüm Avropada fərqli “Neftçi” olacaq. Mən həmişə nikbinəm. Mən bu səhnədə qalibəm. “Neftçi” bu gün Avropada özündən söz etdirirsə, bu, qələbədi. Mən söz vermirəm ki, gələn il bu komandada qalacam və daha yaxşı nəticələr qazanacam. Bunu zaman göstərəcək. Bu gün isə biz qalibik. Mənim öz dəst-xəttim var, mənim komandam millinin oyununu təkrarlaya bilməz. 4-5-1 sistemiylə oynayırıq, hücuma keçəndə 2-7-1 sisteminə keçirik. Vobay bütün oyunlarda yaxşı oynayıbsa, bu oyunun ikinci hissəsində zəif oynayıbsa, o deməkdi ki, zəif oyunçudu? Sabah mən bir-iki oyunda uduzsam, deyəcəksiz, zəif baş məşqçiyəm? Qrafikimiz sıxdı, oyunçuların bütün oyunlarda eyni səviyyədə oynaması mümkünsüzdü. Bahodir Nasimov istedadlı oyunçudu. Məşqlərə başlayıb, ancaq pik nöqtəyə çatması üçün vaxt lazımdı. Onun adının bugünkü oyunun protokoluna salınması ona stimul idi. İnanıram ki, o bu jestimizi layiqincə dəyərləndirəcək”.
Böyükağa Hacıyev geridə qalan 5 Avroliqa oyununda komandasının "ən zəif bəndinin" özü olduğunu qeyd edib: "Gəlin həm imama ağlayaq, həm də yezidə. Mənim nəticələrim sizi qane etmirsə, bu gün istefa verib gedərəm".
