“Belə məsələyə şərh vermək istəmirəm. Çünki bu, çirkin oyundu”
Bunu açıqlamasında “Zirə”nin baş məşqçisi Ayxan Abbasov deyib.
“Keşlə”nin futbolçuları Nizami Hacıyev və Mirhüseyn Seyidovun Premyer Liqanın son turlarında danışılmış oyunda iştirak etməsi məsələsinə münasibət bildirən gənc mütəxəssis bunu pisləyib: “Ad qazanmaq üçün illərlə əziyyət çəkirsən. Heç bir kluba, futbolçuya bunu arzu etmərəm. Bu, kluba yox, Azərbaycan futboluna xəyanətdi. Məsələ gərək tam aydınlaşdırılsın, ondan sonra nəsə danışmaq olar. Məncə, heç kim fikir bildirməyə tələsməməlidi. Gözləyək. Yəqin ki, bu yöndə işlər gedir”.
“Keşlə” klubu bugünkü bəyanatında adıçəkilən oyunçuların çempionatın son 5-6 görüşündə alverdə iştirak etdiklərindən şübhələnərək, onlarla müqaviləyə xitam verildiyini bildirib. Paytaxt təmsilçisi isə bir tur əvvəl öz meydanında “Zirə”yə 0:1 hesabı ilə məğlub olub. Bu bəyanatı doğru saymayan Ayxan Abbasov “Keşlə” ilə görüşdə şübhəli məqama rast gəlmədiyini vurğulayıb: “Əgər klubun sübutu varsa, başqa məsələ. Ancaq hansısa klubun adını çəkmək, son 5-6 oyunda şübhələrin olduğunu bildirmək böyük ittihamdı. Bizim klubumuz belə şeylərə qarşıdı, heç bir komanda ilə bu yöndə söhbətimiz ola bilməz. Bir az ehtiyatlı olmaq lazımdı. Hansısa klubla oyunu hallandırmaq, məncə, düzgün deyil. “Keşlə” ilə görüşümüz gərgin keçmişdi. Sona qədər mübarizə getdi. “Keşlə”nin futbolçularının əzmkarlığını görürdüm. Hətta son dəqiqələrdə bərabərlik qolunu da vura bilərdilər. Şəxsən mən həmin matçda şübhəli məqam hiss etmədim”.
Abbasov oyun alqı-satqısı məsələsinin dünya futbolunun ən böyük problemi olduğunu sözlərinə əlavə edib: “Bu yaxınlarda UEFA-da seminarda idim. Təşkilatın sədri bu məsələ ilə bağlı çıxış etdi. Deyərdim ki, hətta UEFA da bununla bacarmır. Təkcə Azərbaycanda yox, bütün dünyada analoji problem var. Təbii ki, belə hallar idmanın özəlliyini, mübarizəni “öldürür”, azarkeşləri həvəsdən salır. Bununla mübarizə aparmaq lazımdı. Qarşısı sərt şəkildə alınmalıdı ki, digərlərinə örnək olsun”.
apasport.az
