Tofiq Bəhramov adına Respublika stadionunun direktoru Akif İsmayılovun Korner.az-a müsahibəsi
– “Qarabağ” – “Dnepr” oyununda baş vermiş məlum hadisə ilə bağlı nə deyə bilərsiz?
– Sıxlıq yaradıblar deyə, qapı təzyiqə dözməyib, çıxıb yerindən.
– Məlum məsələdir ki, “Qarabağ”ın bütün Avropa Liqa matçlarına azarkeşlərin marağı çoxdur. Növbəti dəfə də eyni hadisə yaşana bilər?
– (gülümsəyir) Hər dəfə belə bir şey olur?
– Deyirsiz ki, sıxlıq yaranıb. Akif bəy, azarkeşlərin “Qarabağ”ın Avropa oyunlarına marağı həddən artıq çoxdur. Belə də sıxlığın yaranması da nəzərə alınmalı idi.
– (sözümü kəsir) Yəqin, bu dəfəsıxlıq bir az çox yaranıb da. Kim istəyərdi ki, o qapı insanların üzərinə düşsün? Buna görə də stadiona bir az tez gəlmək lazımdır. Bu hadisə oyun başlayandan sonra olub.
– Bu məsələyə görə stadion rəhbərliyi və ya mühafizə işçiləri nə dərəcədə məsuliyyət daşıyır?
– Heç bir məsuliyyət daşımır. Rəhbərliyin nə günahı var? Stadion hazırlanıb, klub yüksək səviyyədə yola salınıb. Azarkeşlər stadiona gəlməlidirlər, iğtişaş yaratmalı deyillər, hər şey normal olmalıdır. Rəhbərlik nə məsuliyyət daşımalıdır? Qapını itələyiblər, qapı sınıb, düşüb, buna görə məsuliyyət daşıyırlar? Qapını sıxmasan,sındırmasan qapı sınar? Mən indi azarkeşi də günahlandırmıram, o da insandır da. O qapı mənim də üstümə düşə bilər. Düz deyil? Başqa birisinin də üstünə düşə bilər.Yəqin ki, orda sıxlıq yaranıb, biz bütün stadionu gəzib, bütün yerlərə nəzarət edə bilmərik, axı. Hər şeyə nəzarət edən işçilər “Qarabağ”ın tabeliyində idi. Ya azarkeşlər oyuna gec gəliblər, ya orda kimsə darvazanı bağlayıb. Mən orda nə baş verdiyini dəqiq deyə bilmərəm.
– Bununla bağlı araşdırma aparılacaq?
– Araşdırma gedir, bəli. Tədqiqat başlayıb. Yəni, bir neçə şahidlər var ki… Nəinki bu qapıda, istənilən giriş nöqtəsində sıxlıq var idi. İndi qəzadır da, baş verib. Və darvaza əks tərəfə sıxılıb. Sıxıblar əks tərəfə. O da bir tərəfə açılır da, bir neçə dəfə bu hal təkrarlandıqdan sonra təzyiqə tab gətirə bilməyib aşıb. Və belə bir hadisə baş verib. Cavan oğlandır, kim istəyərdi ki, başına belə bir iş gəlsin?
– “İnter”lə görüşdə azarkeş marağının maksimum səviyyədə olacağını nəzərə alsaq, belə halların təkrarlanmaması üçün daha yüksək səviyyədə tədbir görülməlidir.
– (yenə sözümü kəsir) Biz stadion rəhbərliyi olaraq, arenanı hər bir sahədə hazırlayıb, təhvil veririk. Biz təhlükəsizliyə tam təminat vermirik, buna klub özü nəzarət edir. Mühafizəçilər, polislər var. Yəqin ki, nə demək istədiyimi başa düşdüz. Biz stadionu tam hazırlayırıq. Və onu icarəyə veririk. Qapıların sınması o demək deyil ki, görüşə yaxşı hazırlaşmamışdıq. Bir darvaznın zərər görməsinə görə işimizə qiymət verməyin. Son 15-20 ildə heç belə bir hadisə olub? Xatırlaya bilərsiz? Bu birinci dəfə idi ki, belə bir şey baş verirdi. Yəqin ki, orda hansısa bir problem yaranıb. Başa düşürsüz? Bundan sonra stadiondakı nəzarət kameralarının sayı bir neçə dəfə artırılacaq. O qədər çox olacaq ki, biz stadionun hər bir nöqtəsində baş verələri görə biləcəyik. Allah qoysa, belə olandan sonra biləcəyik, belə hallarda günah kimdə olur. Özünüz də bilirsiz ki, azarkeşlər oyuna çox gec gəlirlər. Çox gec. Saat 9-a 10 dəqiqə işləmiş idi, hələ 3 min insan oturmuşdu stadionda.
Ürfan Məmməd
