"Xəzər Lənkəran"ın qolkiperi Orxan Sadıqlının Korner.az saytına müsahibəsi
– Orxan son turda prinsipial rəqibiniz "Bakı"ya məğlub oldunuz. Bu məğlubiyyəti necə şərh edərdin?
Həmin oyunu biz zəif oynadıq, "Bakı" isə güclü. Günah bizdə oldu. Əgər biz də, yaxşı oynasaydıq o zaman fərqli nəticə olacaqdı.
– Zəif çıxışınızı nə ilə əlaqələndirərdin?
"Bakı" ilə oyunda nə isə özümüzə oxşamırdıq. İstədiyimiz oyunu qura bilmirdik. Burda oyunçu azlığının da az rolu olmadı. Heyətimizin kasad olması da bu məğlubiyyətin səbəblərindən biri idi. Silamasın zədələnməsi də oyunumuza öz təsirini göstərdi.
– Yeni ispan baş məşqçinin rəhbərliyi altında ilk oyununuz idi bu. Ümumiyyətlə, Bakesin digər məşqçilərdən fərqli xüsusiyyətləri varmı?
Yeni baş məşqçimiz İspaniyadan, "Barselona"dan gəlib. Yəni ad bəs edər ki, necə məşq etdiyimiz anlaşılsın. Məşqlərimizin çoxu topladı. Qısa ötürmələr və taktikalar üzərində daha çox məşq edirik.
– Amma siz Bakesin rəhbərliyi altında ilk oyununuzdan məğlub ayrıldınız. Zəif çıxışınız baş məşqçi dəyişikliyi ilə əlaqədar olmadı?
Yox. Burda baş məşqçilik heç nə yox idi. Heç kim onda günah axtara bilməz. İki gün idi ki, bizi məşqə çıxartmışdı.
– İkinci qolda sənin səhvin də var idi. Bununla bağlı nə deyərdin?
Səhvlər hər zaman olur, olub, olacaq da. İstər mən, istərsə də digər qapıçılar səhvdən sığortalanmayıb. Dünyanın ən yaxşı qapıçıları da, səhv edir. Çalışacam ki, qarşıdakı oyunlarda bu cür səhvləri buraxmayım.
– "Bakı"ya məğlubiyyətin ardından klub rəhbərliyi sizə iradını bildiribmi?
Klub rəhbərliyindən əlavə, biz özümüz səhvimizi başa düşürük. Ona görə də, bütün "Xəzər Lənkəran"sevərlərə söz verirəm, onlar bizi dəstəkləsin, biz onları sevindirəcəyik. Çünki onlar buna layiqdilər.
– Qarşıdakı turda "Kəpəz"lə qarşılaşacasız. Bu matçdan nə gözləsin "Xəzər Lənkəran" azarkeşləri?
Bu oyunda yalnız qələbəyə oynayacağıq. "Kəpəz" doğma meydanda yaxşı oynayır. Mahmud müəllim yaxşı komanda yaradıb. Çox komandalar orda xal itiriblər. Məqsədimiz yüksək yerlər uğurunda oynamaq, çempion olmaqdısa, bu oyunda qələbə qazanmalıyıq.
Səxavət Qurbanov
