“İnter”in yarımmüdafiəçisi Slavço Georgiyevski klubun saytına müsahibəsində ötən tur baş tutmuş “Turan”la matç barəsində danışıb
– “Turan”la keçirilmiş oyun barədə nə deyə bilərsiz?
– Bilirdik ki, bizi ciddi müqavimət gözləyir. Buna baxmayaraq, komanda oyuna yaxşı kökləndi və qalib gəlməyi bacardı. Komandanı yaxşı oyun və haqlı olaraq qazanılmış üç xal münasibətilə təbrik etmək istəyirəm.
– Görünürdü ki, “Turan” səviyyə baxımından “İnter”ə bir qədər uduzur. Lakin Tovuz komandası bunu mübarizə və arzu hesabına kompensasiya etmək istəyirdi…
– Bəli, rəqib bacardığı qədər mübarizə apardı. Onlar pis oynamadı, heç nədə geri qalmaq istəmədilər. Lakin hər halda səviyyə arasındakı fərq öz sözünü dedi. Bununla belə, “Turan” yaxşı təəssürat yaratdı. Bu komanda yaxşı mübarizə apardı.
– “İnter”i qarşıdan Zaqatalaya səfər gözləyir. Qarşıdan gələn matç barədə nə deyə bilərsiz?
– Bu mövsüm “Simurq” artıq gücünü göstərib. Bu komanda cari çempionatda yaxşı çıxış edir. Bizə bu oyuna yaxşı hazırlaşmağımız lazımdır. Oyun hər iki komanda üçün çətin olacaq. Biz birinci yerdə gedirik. Liderə qarşı oyunlarda, bildiyiniz kimi, hamı xüsusi köklənir.
– Cari çempionat sürprizlərlə zəngindir. Demək olar ki, aşkar autsayderlər qalmadı. Necə düşünürsüz, “İnter” belə mürəkkəb mövsümdə çempionluq uğrunda mübarizə apara biləcək?
– Biz buna çox ümid edirik. Bu mövsüm ikiqat çətindir. Axı istənilən komanda istənilən rəqibini məğlub edə bilər. Bir də ki, hələ aydın deyil, ilk “altılıq”da kim olacaq. Halbuki ötən mövsüm bu vaxt anlamaq olardı ki, ilk “altılığ”a hansı komandalar düşəcək. Bir sözlə, bu mövsümdə kompromissiz mübarizə gedir. Qarşıda daha da ağır olacaq, ancaq biz uğura inanırıq. Bizə xallarımızı əldə etmək, qələbə qazanmaq və məqsədimizə doğru irəliləmək lazımdır.
– Bəs çempionluq yolunda “İnter”in əsas rəqiblərinin hansı komandalar olduğunu görürsüz?
– Bu barədə danışmaq hələ tezdir. Hər komanda sürpriz edə bilər. Bizə bütün matçlara köklənmək lazımdır. Zəif rəqib olmur.
