İki boksçumuz finalda!
17.05.2024 , 12:58
Macarıstanın Eqer şəhərində keçirilən gənc boksçular arasında beynəlxalq turnirdə yarımfinal mərhələsi yekunlaşıb.
Korner.az xəbər verir ki, finala gedən yolda Azərbaycan millisinin 2 üzvü də rinqə çıxıb.
60 kq-da Tağı Nəsibov yerli Daniel Frankla qarşılaşıb. Hər 3 raundu xeyrinə bitirən boksçumuz 5:0 (30:26, 30:26, 30:26, 29:27, 30:26) hesabı ilə qələbə qazanaraq finala yüksəlib. O, həlledici görüşdə özbəkistanlı Abdulaziz Jurakulovla üz-üzə gələcək.
Abbasqulu Şadlinski (71 kq) də komanda yoldaşının uğurunu təkrarlayıb. O, yarımfinalda Rastislav Aniskodan (Slovakiya) güclü olub – 5:0 (29:27, 29:28, 29:28, 29:28, 29:28). Şadlinski finalda Arpad Jamborla (Macarıstan) qarşılaşacaq.
Final döyüşləri bu gün keçiriləcək.
