İspaniyanın "Atletiko" klubu ilə birgə əməkdaşlıq edən paytaxtın eyni adlı klubu olan “Bakı”nın bu gün Madrid klubunun nümayəndələrinin iştirakı ilə mətbuat konfransı keçirilib.
Korner.az-ın məlumatına görə, tədbirdə “Bakı”nın prezidenti Hafiz Məmmədov, İspaniya klubunun marketinq üzrə meneceri Emilio Qutyerres Bolos, baza direktoru Karles Aqiler Martin və AFFA-nın baş katibi Elxan Məmmədov iştirak edib.
Mətbuat konfransında çıxış edən AFFA-nın baş katibi Elxan Məmmədov bildirib ki, AFFA ilə “Bakı” klubu 1999-2000 təvəllüdlü futbolçular arasında seleksiya xarakterli turnir keçirəcək:
"Turnirdə seçilən 10-20 arası futbolçu “Atletiko” Madridin akademiyasına göndəriləcək. Orada uzunmüddətli təlim-məsq toplanışında olacaqlar. Bütün məsrəfləri “Bakı” klubu ödəyəcək. Bu, Azərbaycan futbolu tarixində ilk belə hadisədir. Bundan basqa, digər layihələr də olacaq. Amma Azərbaycanda uşaq futbolunun inkişafına yönələn əsas hadisə budur. Seleksiya xarakterli turnirdə “Atletiko”nun məşqçiləri, akademiyanın nümayəndələri iştirak edəcək".