“Utah Jazz” – yeni mövsümün sürpriz komandası!
19.08.2019 , 13:17
Son iki ildə play-offa qalan, amma hücümdaki dar potensiala görə əziyyət çəkən “jazzman”lər bu il bu problemi birdəfəlik aradan qaldırmaq üçün mövsüm bitən kimi işə başladı.
“Memphis”dəki yenidənqurma işləri ilə əlaqədar komandadan hələ keçən qış göndərilməsi istənilən Mike Conley “trade” nəticəsində “Utah”a qatıldı, qarşı tərəfə isə Grayson Allen, Kyle Korver, Jae Crowder və Darius Bazley üçün “draft” haqqı göndərildi. Daha sonra ehtiyatdan gəlib lazımlı hücüm dəstəyini verə biləcək Jeff Green və Emmanuel Mudiay ilə yeni müqavilələr imzalandı. Komandadan ayrılan Derrick Favorsun boşluğunu isə Ed Davislə doldurmağa çalışacaqlar. Lakin ən önəmli uğurları keçən il “İndiana”da Oladiponun zədəsindən sonra komandanın bir nömrəli hücüm seçiminə çevrilən Bojan Bogdanovic ilə müqavilə imzalamaları oldu. Conley ilə anlaşdıqdan sonra Ricky Rubioya yeni müqavilə təklif edilməyəcəyi aşkar idi və oyunçu komandanı tərk elədi. Eləcə də cüzi dəqiqələr alan Thabo Sefolosha, Ekpe Udoh, Raul Neto ilə də yollar ayrıldı.
Quin Snyderin komandaları müdafiə baxımından həmişə ilk sıralarda olurlar, komandanın müdafiə quruluşu Rudy Gobertin etibarlı oyunu üzərində qurulur, təsadüfi deyilki oyunçu son iki ildə ən yaxşı müdafiəçiyə verilən mükafatın qalibi olur. Lakin play-offda açıq-aşkar görünürdü ki, komandanın hücüm potensialı həlledici anlarda kifayət etmir. Yeni mövsümdə isə hücüm potensialı artan komanda rəqibləri üçün əsl baş ağrısına çevrilə bilər. Bu il NBA-də 3-cü ilini keçirəcək Donovan Mitchelın çiynindəki yükün azalması oyunçunun özünü daha rahat hiss etməsi və oyununun lazımlı yöndə inkşaf etməsinə kömək edəcək. Bir alqışı da komandanın rəhbərliyinə ünvanlamaq olar, xatırlatmaq istəyirik ki, Salt Lake City NBA-də qaradərili oyunçuların getmək istədiyi son şəhərlərdən biridir, bunun başlıca səbəbi mormonlar dediyimiz xristian məzhəbinin bir qoludur. Azad agentlərin nadir hallarda seçdiyi “Utah Jazz”, trade nəticəsində heyətinə qatdığı Conleydən daha yaxşı aktiv yəqin ki tapa bilməzdi. Proqnozlarımız “Utah”ın Qərb konfransını ilk 3-lükdə bitirəcəkləridir
Müəllif: Rüfət Zairov
