Avropa Liqasının II təsnifatının ilk görüşləri çərçivəsində səfərdə “Makkabi” ilə qarşılaşacaq “Xəzər Lənkəran”ın baş məşqçisi Con Toşak bu gün mətbuat konfransı keçirib.
Korner.az-ın məlumatına görə, uelsli mütəxəssis Hayfa klubu ilə matçın çətin keçəcəyini bildirib:
“Bura ilk dəfədir ki, gəlirəm. Rəqibin bəzi oyunlarına baxmışıq. Amma buna əsasən komandanın həqiqi gücünü bilmək çətindir. Çünki mövsüm təzə başlayır, komandalar hələ tam formalaşmayıblar, hazır vəziyyətdə deyillər. Bununla belə, son günlər bizim üçün də çətin olub. İyunun 20-dən indiyədək çox səyahətlər etmişik. Əvvəl Azərbaycandan Almaniyaya, ardından Almaniyadan Maltaya getmişik. Maltanın “Slima” klubu ilə oyundan sonra yenidən Bakıya, Bakıdan Lənkərana, indi isə Hayfaya gəlmişik. Bu, mövsümlərarası fasilədə həddindən artıq çox səyahətdi”.