"Bundan öncə Azərbaycan futbolunun müstəqillik dönəmində yeni bir səhifə açıldı, yeni bir tarix yazıldı. "Neftçi" öz flaqmanlığını bir daha sübuta yetirdi. Belə də olmalı idi. Bildiyiniz kimi kluba biz gəldikdən sonra klub prezidenti Sadıq Sadıqovun rəhbərliyi ilə xüsusi proqram hazırlandı və iki il ərzində hədəfləmişdik qrupa düşməyi, Azərbaycan xalqına bu sevinci yaşada bildik. Bununla təbii bu gün "Neftçi"də çalışan klub prezidentindən tutmuş sıravi əməkdaşına qədər hər biri fəxr edə bilər".
Bu sözləri Korner.az-a açıqlamasında "Neftçi" klubunun vitse-prezidenti Tahir Süleymanov deyib. Klub rəsmisi bu gün atılan püşkdə "Neftçi"yə rəqib olan komandalardan da danışıb:
"Dünya şöhrətli "İnter"i Bakıya gətirmək bu özü tarixdir. Çalışacağıq ki, qrupda da adımıza layiq çıxış edək. Tarixi qələbədə klubun legioner və təcrübəli futbolçuları ilə yanaşı, U-21-in bir neçə üzvü çıxış edirdi. Dünənki oyunda Elvin Yunusov, Cavid İmamverdiyev, Araz Abdullayev, Mirhüseyn Seyidov, Tərlan Quliyev və digər yetirmələrimiz APOEL-ə qarşı forma geyindilər. Artıq onlar üçün də Avropanın qapıları açılır. Çox təəssüflə bildirirəm ki, dünənki oyun canli yayımlanmadı. Bu da düşündürücü məqamdı. 25 minə yaxın azarkeş hansı təzyiqləri göstərdi "Neftçi" klubuna. Hətta bir neçə dəfə oyun dayandı. Bütün bu təzyiqlərə baxmayaraq "Neftçi" öz möhtəşəm oyunu ilə 3:1 hesablı tarixi qələbə qazandı. Arzumuz budur ki, belə qələbələr davamlı olsun və "Neftçi"nin ardınca digər klublarımızda gəlsin. Klubumuz həm qrupda, həm ölkə çempionatında öz iddialı çıxışını davam etdirəcək.. Azarkeşlərə, mətbuat işçilərinə də öz dərin minnətdarlığımı bildirirəm".
RÖYA
