Türkiyədə təlim-məşq toplanışını davam etdirən “Simurq” klubu iyunun 30-da ilk yoldaşlıq görüşünü keçirəcək.
Korner.az-ın məlumatına görə, “Green Park” otelinin meydançasında baş tutacaq qarşılaşmada Zaqatala təmsilçisinin rəqibi “Spartak-Nalçik” kollektivi olacaq. Oyun Bakı vaxtı ilə saat 18:00-da start götürəcək.
“Simurq”un qardaş ölkədəki növbəti rəqibi isə Gürcüstanın “Dila” klubu olacaq. Qori şəhərinin təmsilçisi ilə görüş iyulun 3-də keçiriləcək. Klubun Kartepedəki son yoxlama oyunu isə ayın 7-nə nəzərdə tutulub. Ancaq rəqibin kim olacağı dəqiqləşməyib.
Qeyd edək ki, Zaqatala təmsilçisi hazırlıqla yanaşı transfer çalışmalarını da davam etdirir. Hazırda komandanın düşərgəsində baxış üçün dəvət edilmiş üç futbolçu var. Məşqçilər korpusu onlar haqqında son qərarı “Spartak-Nalçik”lə görüşdən sonra verəcək.
